Homily By Rev. Fr. Joseph Zo Mung (Christmas Midnight 2021)

Topa Jesu hong suah nading bang zahta in haksa aa, leitungah thuman thutak hong tun nading bangzahta in haksa hiam? Thuman thutak hong tun ciangin zong asang ding leh a tel ding bangzahtak in mi haksa hiam cih pen tuni Christmas pawini in hong thei sak hi.
Leitung mite agum ding, a honkhia dingin leitung ah gumpa honpa hong pai ding cih pen taanglai pek panin kamsangten a na tangko khol hi. Ahi zongin kua hi ding cih ki thei lo hi. Tulaitak I Kawlgam ah suahtak nading ki hanciam in kua-in hong honkhia ding, hong tankhia ding, kua-in hong makaih ding, kua in Pasian deihna tawh kituakin eite hong uk ding cih kilungkham tek hi. Topa Jesu a suahma in zong tua hun lai a mite tua bang mah in na lungkham hi. Israel mite, Egypt gam ah sila hihna pan kua in hong hong suakta sak ding ci-in amau a tankhia ding pen lametna tawh ngakin om uh hi.
Amaute ahonkhia ding khat hong pai ding hi cih thu kamsang te in tangko khin uh hi. Koi munah koi ci bangin hong pai ding cih zong gen khol zo hi. Tua bangin a kigen khol sa mah bangin Topa Jesu in mihingte pian zia mah bangin hong pai-in khangtampi ngaksak hi. Mite in ngaklah mahmah uh hi. Hong suah ciangin zong kei Pasian hing ci-in na hong sem pah ziahziah lo hi. Eite in zong tu in Democracy I ngah na ding I ngaklah mahmah hi. Ahi zongin na hoih khat, thuman thutak khat leitungah a kizelh ding cih pen ngaklah thu tawh hilo a, damdam in Pasian deihna zia tawh hong pai ahi hi cih pen Topa Jesu hong pai zia tawh I thei hi.
Lungdam pawi ah lungdam ni. Apua lam ah tulaitak haksatna a thuak ulehnau tampi om hi. Natna satna thuak zong tampi om a, gal leh sa hang tawh buaina thuak zong tampi om hi. Tua te adingin zong thungetsak ni. Eite ading leh amaute adingin Topa Jesu hong suak hi. Ahi zongin amaute in zong a om na ciat panin Topa Jesu a na san leh haksatna thuak mahtaleh, khuadam thuakin om mahta leh a om na mun pan lungnuam ding hi. Banghang hiam cih leh amaute in thuman thutak adingin na a sem ahih manin lungnopna ngah ding hi.
Topa Jesu in eite tungah tuni lungnop kicinna hong pia a, tua pen Pasian in eite hong tatkhiatna, hong hotkhiatna, hong it man a, ama thu, thuman thutak I teltheih nadingin a tapa hong piakhiatna ahi hi. Leitungah Pasian in nahoih na lian hong piak khempeuh pen Tonu Maria tungtawn in hong pia hi. Christmas pawi I bawl sialsial in kua phawk ding I hi hiam? A Nu Tonu Maria I phawk ding kisam hi. Pasian ii hong piak letsong, leitung mite hong itna hong piak letsong alian penpen in Tonu Maria tungtawn in I ngah hi cih phawkni. Tuni in eite in Lungdam pawi I bawlna te ah a lungdam zo lo ulehnau te khempeuh ading thungetsak in amaute in thuman thutak a san na hang tawh a tawntung lungnopna angahzawh na dingun thungetsak ciatni.