Homily By : Rev. Fr. Joseph Zo Mung (Christ the king (Nov 21, 2021))

Jn 18 : 33 – 37
Tuni, Nu Catholic Pawlpi in Jesu Christu in Kumpi ahih na, Topa Jesu in Kumpi ahihna pawi hong bawl sak hi. Hih pawi pen Pope Pius XI na in, AD 1925 kum panin leitungbup ah bawl dingin hong ciapteh sak hi. Hih pawi pen Biakpiakna pawi aman ciangin Hunnautaang nipi kaal (34) na ah kibawl hi.
Tuni ih sim Lungdamna Lai Siangtho sungah zong Topa Jesu in Kumpi ahihna thu ih mu hi. Pilate mangpa in nang mahin Jew mite Kumpi na hi hiam ci-in adot ciangin Topa Jesu in keima Kumpi gamin hi leitung hilo hi. Keima kumpi gamin hi leitung hileh Jew mite khut sung ka tun loh nadingin ka nungzuipite in a do ding uh hi. Ahi zongin keima Kumpi gam in hih leitung hilo hi ci-in Pilate kiangah gen hi. Topa Jesu ii Kumpi ahihna in thuman thutak leh itna tawh kilemna, lungnopna, nopsakna om hi.
Tua ahih manin hih kumpi hih na dingin ei Christian te in tuisawpna ih san ciangin I taltang tungpan sathau siangtho hong kinuh, I sipzang pan sathau siangtho hong kinuhin nang pen Siampi nam, Kumpi nam, Kamsang nam na hi hi ci-in hih namthum asuak dingin Christian nuntakna ah tuisawpna ih ngah ciangin kumpi suahna za hong kipia hi.
Tua ahih manin apicing Christian nuntakna aneite, Topa Jesu ii Kumpi ahihna pawi abawlte in ama hang tawh mikhat asiat ding lau hi. Amanlo aa atatkhilh ding lau hi. Amanlo a teci apang sangin si ngamzaw in, anuntakna pia ngamzaw hi. Tua ahih manin tuisawpna angahna pan a asan thupha, thuman thutak avomte, anuntakpih te in singkung lopa, ganhingte, mihingte tungah itna lakin tua te khangto sak a, tua pen Kumpi sepna ahi hi. Ih sih khit ciangin thukhenna omlai ding, ih mawhna tawh kituakin thu hong khen ding cih thei ahih manin thuman thutak deih, thuman thutak zong, thuman thutak tawh nungta in, ahoihlo khempeuh apelh zawh nang hanciam in thuman thutak pen nuntak pih ngam, sihpih ngam hi.
Tua ahih manin utenau te Topa Jesu in Kumpi ahihna, amah in Kumpi himah taleh kiniamkhiat in mite adingin sihna a thuakna tawh mite khempeuh hong hotkhiatna thu te phawkin eiten zong hih pawi ih bawlna hangin ih nuntakna te ah leitung Kumpi, vantung kumpi ih hihzawh nangin Topa Jesu khekhap zui-in thuman thutak leh dikna, hoihna phatnate masuanin, tua te ih nuntakpih zawh nangin han ciamni.