Homily By Rev. Fr. Joseph Zo Mung (28.12.2021)

Holy Innocents pawini
Pawlpi in kumsim in December 28 ni pen (Holy Innocents) a siangtho naupangno te pawi, Pasian nasem naupangte pawi ci-in hong ciapteh sak hi.
Tuni I sim Laisiangtho sungah Misiangtho Joseph in mang nei-in amang sungah a kihil mah bangin Tonu Maria leh Topa Jesu Egypt gamah a taipihna thu I mu hi. Tua banah Herod kumpipa in mipil thum te in amah a khem lam thei ahih manin kumnih nuaisiah naupang khempeuh thatlum ding cih thupia in Bethlehem khua leh a kiim a om gamte khempeuh ah kumnih nuaisiah naupang khempeuhin thahna athuakna thu I thei hi.
Hih thupiangin eite bang hong theisak hiam? Tua thahna a thuak te in Topa Jesu theilo hi. Ahi zongin amaute in banghangin thahna thuak ahi hiam cih leh mawhneilo, a siangtho Topa Jesu, kei-in thuman thutak ka hi hi a ci, a thuman Topa Jesu pen Herod in thatnuam ahih manin Topa Jesu min hangin thahna athuak ahi hi. Tua ahih manin amuate in mawhna nei lo-in thahna thuak a, bawlsiatna thuak, mawhna nei lo asiangtho naupangte tua te adingin eite in zahtak piakna I nei a, misiangtho in zong I ciamteh hi.
Tua ahih manin Christian upna ah simmawh bawlsiatna, haksatna I thuak ciangin tua te khempeuh in khiatna nei hi. Pasian deihna ci-in zong I ciamteh hi. Ahi zongin tu hun tu laitak mi khempeuh in a up in haksatna I thuak ciangin banghang in thuak hi ding hiam? Kamsiatna I tuak ciangin amawhdan hang hi ding hi, a tua cih mah ding hi ci-in ngaihsun in kisimmawh in, ki en neu in ki paampaih thei kha hi. Tua pen leitung thu hi.
Hih naupangte banghangin Pasian nasem ki ci hiam? Amaute in a kam tawh tangko lo, gamtatna tawh zong tangko lo ahih hangin thuman thutak ading, Pasian a dingin anuntakna uh piakhia ahih manin tua in Pasian nasepna hi. Tua ahih manin eite khat ciatin Pasian deihna zui-in, thuman thutak zongin mu a, I nuntakpih na ding leh i nuntakna te ah leitung nate tawh kisai in haksatna, simmawhna, bawlsiatna, tuahsiatna te I thuak ciangin Pasian in kei adingin bang hong deih ahi hiam cih phawkin lungkim takin I thuaksiam ding zong kisam a, Pasian in a deihna om ding hi. Pasian in a hoih apiang na ding a ei hi bangin hong thuaksak hi cih phawkin eite in lungnuamtak, maitai takin Pasian itna tawh thuaksiam lehang leitungah lungnopna, nopsakna ngah ding hanga, vantung ah zong kham lukhu ngah ding hi hang.