Homily By Rev. Fr. Joseph Zo Mung (20.2.2022, Sun)

Lk 6: 27 – 38
Tuni I sim Lungdamna Laisiangtho sungah Topa Jesu in eite zuih ding thu hong hilh in hih pen ahaksa mahmah thu khat ahi hi. Tua in bang hiam cih leh na gal te na it un. No hong mudahte tungah a pha na bawl un. No hong phuisamte thupha na pia un ci-in itna I zatkhiat ding zia hong hilh hi. I khanglui ngeina ah ei hong te anbang ki-it a, ei hong ngai te mu bang ki ngai hi ci hi. Ei hong it te tung bek ah it kik ding ciang bek in zong ki ngaihsun hi. Ahi zongin Christian I suah khit ciangin ei hong langpang mite khempeuh tungah zong it na lak ding cih pen Topa Jesu in hong hilh hi.
Tuni Laisiangtho masa sungah Saul kumpipa leh David kumpipa te nuntakna te en leng, Saul in David that nuam in zong hi. David ii bukna suanghawm sungah Saul ii galkapte tawlin tawlnga aa, David in tua lai ah Saul that nuam leh a ki that thei lua hi. Ahi zongin David in Pasian sathau nilhpa tungah ka khutlum ka nga kei ding hi. Bang mah ka cih kei ding hi ci-in amah in Saul ii Teipi leh a tui thawl la-in paikhia hi. Tua bangin a piakhiat khit ciangin Saul tungah ki-ap kik aa, na Teipi leh na tui thawl na galkapte khat hong lasak in. Ken nang hong that nuam leng hong that thei hing, ahi zongin nang kong maisak hi. Kei na khutnuai mipa hing, nong bawl nop bangin hong bawlin ci-in Saul kiangah ki piakhia hi. Ahi zongin amah in Saul that nuam leh a that theihna, a itna thu Saul telsak masa hi.
Tua ahih manin Saul in zong David in amah a itna thu a theih ciangin amawhna ki sikkik in tua munah kilemna om kik hi. Tua in I nuntakna sungah I ngaihsut mahmah ding hi. Tua ahih manin David in, Topa in mi khempeuh a thumanna leh a thutakna hangin thaman pia hi ci hi. Kei thuman ka hih manin thaman hong pia ding hi cih um ahih manin aman Saul tungah thuman lo in that nuam lo hi. Bangzahta in Saul in thuman lo-in thukkik nuam ta leh David in thuk kik lo-in thuman tawh om hi. Tua in ei Christian te nuntakna sungah I zuih ding thu ahi hi.
Eite in nisim I nuntakna sungah itna bang ciang nei zo ka hiam cih I ki sit ding kisam hi. Itna I neih ciangin hehpihna ki nei aa, hehpihna I neih ciangin mite ki huh nuamin, thupha ki bawl nuam aa, na hoih kisem nuam hi. Itna I neih ciangin mawhmai sakna zong ki pia zo hi. Tua a hih manin eite in I nuntakna te sungah I ngaihsut dingin Topa in hong it te bek it ding hong hilh hi lo aa, I galte tung nangawnah itna neih ding, ei bawlsia te tungah thupha bawl ding hong hilh hi.
Pasian in hong bawl lai-in leitungah itna tawh a nuamsa ding, anungta dingin leh vantungah zong a tawntung nopsakna angah dingin hong deih ahih manin tua te ngaihsun lehang, a sia agamta te zong amawhna uh a kikhel na dingun eite in I hilh ding aa, eite in amau te I it lam pen I telsak ding, itna I lah ding a kisapna thu zong tuni Laisiangtho in hong thei sak hi.
Tua ahih manin eite in hi Laisiangtho sungah I zak thu te phawkin, Topa Jesu hong hilh thu te phawkin I gal te tungah itna I neihzawh nang, mawhmai sakna I piak zawh nang, mi khempeuh tungah itna I neih zawh nangin han ciamni.