Homily By Rev. Fr. Joseph Zo Mung (17.5.2022)

Jn 14: 27-31
Christu sungah kong it thuzui ulehnau te, tuni lungdamna Laisiangtho sungah Topa Jesu in “Lungnopna note kong nusiat hi, keima lungnopna note kong pia hi, leitung mite piak bangin kei mah in note kong pia kei hi, note na lungkham kei un” ci-in Topa Jesu in a nungzuipi te tungah lungnopna na pia hi.
Topa Jesu ii a nusiat peace ah pen, lungnopna, kilemna, nopsakna te a ki hel siat hi. Lungnopna, nopsakna cih pen I muh dan a tuamtuam om in, ki bang lo hi. Ahi zongin Topa Jesu hong piak lungnopna in a dang tawh ki genteh thei lo-in, ama hong piak lungnopna a ngah peuhpeuh in bang bang piang taleh a lung nuam hi. Tuni in Topa Jesu in tua nopsakna a ngah dingin eite hong pia hi.
Misiangtho te enleng, amaute in Topa Jesu ii peace a cih, lungnopna, kilemna, lungkimna ngah a hih manun, haksatna, bawlsiatna thuak taleh amaute in amaute in Pasian tungah kinga in a tawntung in lungnuam zo hi. Tu in zong enlehang, thuman thutak, Topa Jesu a mu te in haksatna thuak taleh lungkim in, a lungsim sung uh ah lungnopna, maitaina ngah uh hi.
Kawlgam sungah enleng, tulaitak in CDM a lut te hitaleh, thuman thutak adingin matna a thuak te hitaleh amaute in thuman thutak a telna uh tawh ki zui-in a gamta te in haksatna a tuak hang un kisik lo-in lungkim takin, lungnuam maitai takin a tawp dongin na sem uh hi. Tu laitaka Generation (G-Z) te en ni. Amaute in haksatna tampi thuak mahtaleh gal zawh mateng, ngimna, gelna te a tangtung mateng, amaute ii a lungtup uh a tung ma tengin hanciam in sep sawmin tua tawh lungnopna ngah uh hi.
Tua ahih manin hih nopnasakna pen bang tawh ki zom hiam cih leh thuman thutak tawh kizom aa, tua sungah a kalsuan te in nopsakna ngah hi. Misiangtho Paul in bawlsiatna thuak, ahi zongin maitai takin si hi. Misianghto Stephen zong tua bang mahin maitai takin si hi. Tua ahih manin Topa Jesu hong piak lungnopna, nopsakna pen eite in bang ci bangin ngah ding I hi hiam.
Topa Jesu in tuni in hong pia khin hi. Ahi zongin tua nopsakna pen amah tawh I kizop kei leh I nuntakna te ah lungnopna omlo dinga, leitung nate I nei aa, I deih I ngah hangin zong lungnopna, lungkimna omlo ding hi. Eite khat ciatin ngaihsun ni. Topa Jesu in hong nusiat nopsakna ngah ta un, lungnopna ngah ta un a cih pen ei sungah hong om hiam cih phawkni. Tua nopsakna I ngah leh leitung nate ki cinna omlo himah ta leh a tawntung in lungnopna, maitaina, nopsakna om ding aa, tua nopsakna pen mihingte ki piak theih hi lo-in, Pa Pasian hong piak hi-in, tua pen a ngah te in a gen khiat theih loh uh hangin Topa Jesu kiangpan ka ngah nopsakna hi cih phawkin lungnuam mahmah ding hi.
Tua ahih manin eite in Topa Jesu hong piak lungnopna, nopsakna te angah zo te, midangte tungah zong a hawm zo te I hih zawh nang hanciam ni. Tua banga I hih zawh na dingin mimal khat kim ciat I biak Topa Pasian in thupha hong pia ta hen.