Homily By : Rev. Fr. John Pau Sian, ( Dec 9, 2021)

Mt 11: 11-15
Tuni Lungdamna Lai Siangtho sungah Topa Jesu in Kamsangpa Johan B pen numei sungpan a piangte lak panin a lian pen ahi hi ci-in na phat hi. Tua mah bangin Vantung ki-ukna sungah a lian penin kua hiam cihna thu leh hi leitungah vantung ki-ukna kipan ta hi cihna thu kikum kawm ni.
Kamsangpa John ii nuntakzia, hong suah zia ih et tak ciangin amah a nu Elizabeth gil sungah a om laitak in Tonu Maria in John ii nu Elizabeth kiangah ahawh ciangin Elizabeth gil sung a om John in Tonu Maria sung a om Topa Jesu pen diangin na dawn hi. Topa Jesu hong pai ma-in John in Topa Jesu hong pai na dingin lampi abawl, lampi asial khol kamsangpa ahi hi. Amah in bang gen hiam cih leh kei mah in khuavak “aw” ka hi hi ci hi. Cih nopna ah khuavak teci apang ding pa cihna hi. Tua mah bangin John in gamsungah thu gen in mite in Topa Jesu amuh theih na dingun lam alak pa hi. Koi ci lam lak hiam cih leh thumanna tawh nuntakzia leh mawhna te kisikna tawh nuntakzia thu te a gen ahi hi. Ama thu a um mite in ama kiangah pai-in kisikkikna ahi, tuisawpna nasang uh hi. Topa Jesu in zong John kiang pan in mite’ kisikkik ding thupi hi cih mel lakna tawh tuisawpna a nasang ahi hi.
John in thumanna thu gen hi. Thumanna in eite leh Pasian kipawlna hong kipsak ding hi. Hi Adventu hun sungin eite in kiniamkhiatna, thuman itna tawh Topa Jesu ih dawn zawh nang hanciam ciatni. Eite in nisim in mawhna ih bawlna hangin Pasian tawh ki gamla semsem in, hi Adventu hun sungpen hong pai ding Topa Jesu ih dawn theih na ding, Pasian tawh kipawl theih nading, ei ii nuntakna sung, ih lungsim sungah ih kipawl theih nading in hun hoih hunpha ahi hi.
Mang te in reconciliation (kilem kikna) a cih pen thumanna ah ki mu pan hi. Cihnopna in tua thumanna in mawhneite in amawhna uh kisikkik ding, amawh mai sak ding te in zong mi mawhna te maisak dingin ready sa-in om ding. Tua mun ah reconciliation om pan hi. Mawhneite in amawhna te uh kisikkik lo hi leh kilemkikna pen om thei lo ding hi. Pasian in ih mawhna te hong maisak dingin ready sa-in om, ahi zongin leitungmite in kisikkikna ih neih ding kisam hi. Tua ahih manin John in Topa Jesu hong pai nading lampi te a sial, lam kawite a tangsak ahih mah bangin eite in amah et-teh in thuman it na, kiniamkhiat na tawh ih mawhna te kisikkik in Topa Jesu hong pai nading lampi sialin tang sakni.