Homily By Rev. Fr. John Mang (Jan 5,2022, Wed)

Mk 6 : 45 – 52
Tuni Lungdamna Laisiangtho sungah Topa Jesu in mihonpi (5000) an a vak khitphet in Galilee gungal khat a om ahi, Bethsaida khua ah anungzuite gunkuang tawh Galilee tuipi kantan in apai nading in thupia hi. Topa ahih leh mual tungah amah guak kanto in thungen in Pa Pasian tawh kizopna na bawl hi.
Tua kawmkal in huihpite kinuai in, tuihualte hongkhanga, nungzuipi te in a gunkuangte uh hamsa takpi in koih uh hi. Ahi zongin tua kawmkal ah Topa in a thungetna mualtung panin nungzuipite gentheih haksatna khempeuh mu hi ci-in tuni Laisiangtho sungah I mu hi.
Topa’n huihpi leh tuihual kawmkal ah nungzuipite kiangah hong pai-in tuihualte kawmkal ah hong pai ciangin nungzuipite in lau-in sikha hi ci-in awngkekgawp uh hi ci-in Laisiangtho sungah I mu hi. Ahi zongin amaute kiangah Topa Jesu in lau kei un, kei mah ka hi hi, tha san un, lungnuam un na ci hi. Gunkuang tungah Topa hong tun ciangin huihpi nung dai-in tuihual te zong dai siang hi.
Tua ahih manin lungkham dahna hamsatna te kawmkal ah gam vai hang, gal leh sa hangin, natna satna te kawmkal ah Topa nang koi ah om na hiam ci-in I sam kha ngei hiam? I Topa nang tawh kei tawh ki lamna I sa kha hiam? tuni I lungngaih ding I deih hi.
Tuni I zak lungdamna Laisiangtho sungah nungzuipi te in Galilee tuipi sungah gentheih haksatna te kawmkal ah Gunkuang hotin dahin a om laitak un Topa Jesu in a thungetna mualtung panin amaute mu hi, thei hi, tel hi. Nang leh kei guh leh tang pailet a hong mu, hong thei Pasian in tuni I gentheih I haksatnate kawmkal ah hong mu hi, hong thei hi cih tuni a thakin tha I lak ding hi.
Tua ahih manin tuni I zak Laisiangtho masa, (1 John 4 : 11 – 18) sungah bang mu I hiam cih leh Pasian in eite hong it mahmah ahih manin eite khat leh khat I ki-it kul hi. Kua mah in Pasian mu ngeilo hi. Ahi zongin khat leh khat I ki-it leh Pasian eite lakah hong teeng hi. Tua banah Pasian in itna hi. Na sungah itna a om leh nang sungah Pasian om hi. Pasian zong nang sungah om hi ci-in nungzui John in ama laikhak na sungah hong hilh hi.
Tua hih manin tuni nang leh kei nuntakna te sungah gentheihna, hamsatna, lungkham sintawlna, huihpi, guahpi, kialpi, galpite kawmkal ah khat leh khat kikal ah, I veng sak, I veng khang kikal ah, gammi gamta te kikal ah ki muanmawhna, ki muhdahna, ki gal neihna te hong khang laitakin nang leh kei lungtang sungah Pasian in mun hong lak ding, itna in mun hong lak ding, hehpihna in mun hong lak ding, khat leh khat ki telsiamna, ki muanna, mawh ki maisakna, ki-itna te hong om na dingin tuni thu I ngen ding hi.
Kitot kiselna te a beina, ki muhdahna, kigal neihna, sikha hi, dawi hi, gal hi, sa hi ci a kimuan mawhna te abeina mun, gam Pasian gam a lam zo dingin nang leh kei mimal khat kimciat nuntakna lungtang sungah itna hong ten theih nading in tuni thu I ngen ding hi. Mimal kim khatciat nuntakna ah I lunggulh ki-itna, ki lemna angah dingin mimal khat kimciat I biak Pasian in thupha hong pia ta hen.