Homily By Rev. Fr. John Mang (Feb 23.2022, Wed)

Mk 9: 38 – 40
Topa’n nang leh kei a cingh nasemte dingin hong deih hi.
Tuni I sim Lungdamna Lai Siangtho sungah Topa Jesu in nungzuipi te thu hilhna lianpi khat na pia hi. Bang hang hiam cih leh nungzui John in Topa Jesu kiangah sia aw, nang min suangin dawi ahawlkhia mikhat mu ka hih manun na kham ung ci-in va zasak hi. Topa Jesu in bang hangin kham na hi uh hiam a cih ciangin ko te tawh kipawl khawmlo ahih manin kham ung, amah ei tawh kipawl lo ahih manin ka kham uh hi a ci ahi hi. Ahi zongin Topa Jesu in kham kei un. Ei hong langpang lote pen ei pawl hi, ei mah hong pawlpih mite hi ci-in Topa Jesu in na gen hi.
Hi mun pan khanlawhna I lak ding thu tampitak a om hi. Tua te sungah Topa’n nungzuipi te pen hazatna lungtang aneih ding uh deih lo hi. Nang leh kei zong midangte thupha ngahna tungtawn in hazatna, thangpaihna anei dingte hilo I hih lam tuni Laisiangtho in hong thei sak nuam hi. Amaute thupha ngahna, gualzawhna sungah angtangpih ding, a lungdampih ding te hi hang cih amasa pen in I phawk ding I deih hi.
Anihna ah lungdamna thu tangko na leh Pasian min tawh, Topa min tawh nahoih napha sep ding pen nungzuipi (12) bek, Siampite bek, biakna lam ah makaite bek ii nasep hilo hi. Pasian nasepna, ahoih apha sep ding pen minamkim, mikim ii vaipuak hi cih hong thei sak hi. Tua banah tuisawpna asang khinsa, Pasian tanu tapa te khempeuh in ahoih apha sem dingin sawlna vaipuak angah Christian te I hih lam I phawk ding zong tuni Laisiangtho in hong theisak hi.
A thumna ah (1Cor 13: 4-6) sungah Misiangtho Paul in “itna sungah hazatna kihel lo hi” na ci hi. Tua ahih manin hazatna, thangpaihna, kidemna te in pawl kikhenna te hong piangsak aa, siatna sung hong tunpih thei hi cih tuni a thakin I phawk ding I deih hi. Itna tawh nasem dingin Topa’n nang leh kei hong sam hi. Tua itna tawh kipiakkhiatna, mite tungah hehpih siamna, pumpi taksa damna, lungsim damna, kha damna, siangthona te a bawl ding, apia dingin, ahawmkhia dingin tuni Topa’n nang leh kei hong zang nuam hi.
Tua Topa adingin nasepna te sungah, ahoih apha nasepna te sungah hazatna, thangpaihna, mudahna, pawl kikhenna a tuamtuam te in siatna hong tunpih banah khat leh khat kikal ah ki langneihna te hong piangsak aa, Pasian tanu tapa I hihna te hong beisak hi. Tua ahih manin tuni nang leh kei Christian nuntakna te sungah itna masuan in, hehpihna te nei-in, mite thupha sangna te ah a lungdam khawm, apahtawi siam ding leh cikna tawh na asem dingin Topa’n nang leh kei tuni hong sam hi.
Tua ahih manin Topa hong sapna te sungah cihtakna, thumanna, diktatna te tawh mapangin Topa ading nahoih semin acingh, a thusiam nasemte I suahzawh nading Topa’n mimal kim khat ciat thupha hong pia ta hen.