Homily By Rev. Fr. John Mang (Feb 16.2022,Wed)

Mk 8: 22-26
I biak Topa’n na upna Kha mit hong honsak nuam hi.
Tuni Lungdamna Laisiangtho sungah mittawpa khat a lawm a gual ten a ziat a vei ah len in Topa kiangah hong paipih uh hi. Topa in zong a khut in len in khua pualam ah a paikhiatpih ban ah a mit cilphihin mipa tungah a khut nga-in thupha pia hi. Topa in na khat peuhpeuh na mu thei hiam ci-in mipa tungah dong hi. Mite mu napi ing in singkung bang sam ee, ki huang ngeeingaai, lam pai tawh ki bang ci hi. Tua ciangin Topa’n mipa mittang tungah a khut nga aa, tua ciangin mitawpa a mit ki hongin teltakin khua mu thei pah hi ci-in tuni Lai Siangtho sungah I mu hi.
Hi munah Topa’n mittawpa mit tungah a cil phih hi (ahih kei leh ) a cillum nuhsak hi. (Pian 2: 7) na sungah “Pasian in leilak pan, leivui tawj mihing bawl aa, a nak sungah nuntakna hu sangsuk hi. Tua mipa leitungah nuntakna a nei mihing hong suak pah hi” ci-in I mu thei hi.
Tua mah bangin tuni mittawpa mit tungah Topa Jesu in a cilphih hi. A cillum nuhsak hi. Nuntakna pia kik hi. Piangsak Pa Pasian in ama khut lum tawh lawngin, ama cillum tawh nuntakna a kipatsak mah bangin Pasian tapa Topa Jesu in tua piansakna khutma mah tawh lawngin damsakna cillum aphihna tawh mittawpa mit ki hongsakin taksa mit khuamuhna te a ngahkiksak banah a piangsak Pa Pasian in a damsak thei Pasian ahih na thei sak phawksak in upna mit honsak hi, upna lungtang phonglo sak hi cih tuni Lai Siangtho in hong thei sak hi.
Tua mah bangin nang leh kei I nisim nuntakna te sungah pumpi taksa natna satna te hangin upna mit hong khaktan, damlohna, uplahna, dawimangpa hong khem bawlna, a tuamtuam damlohna khempeuh pan damna I ngah theih nading leh upna mit ki hongin Kha Siangtho lawngna Pasian kiangpan damsak I ngah theih na dingin tuni Topa kiangah thu I ngen ding hi.
Mittawpa in alawm agualte deihsakna leh hehpihna tawh Topa kiangah hong tun mah bangin, tuni nang leh kei zong I thungetna te hangin I upna mit ki hong henla, a piangsakpa in hong damsak pa hi. Piansakna khut tawh nang leh kei hong damsak thei hi. Damsakna hong ngahsakna hang tawh upna mit te ki hongin Topa hoihna, Topa hong it na te mu in, I upna lungtangte khanglo, phonglo in Topa deihna banga anungta zo, nang leh kei damsakna a ngah Pasian tanu tapa te I suah zawh na dingin I biak Topa’n mimal kim khat ciat thupha hong pia ta hen.