Homily By Rev. Fr. Dominic Langh (26.12.2021, Sun)

Innkuan siangthote Pawini
Ih pawlpi in Innkuan siangtho Jesu, Maria, Joseph te etteh in thupha tawh a kidim den innkuan, Christian innkuan ih hih theih nang zong hong deih sak mahmah ahih manin Lungdam pawi khit nipi masa pen Innkuan siangthote pawi hong bawlsak hi.
Topa kihta aa, ama lampi a zui mikhempeuh te in thupha ngah ding hi ci-in Salan dawngtawina ah I zak mah bangin tuni I Laisiangtho sim te in Pa te leh Nu te pen ta te sangin a sangzaw, a lianzaw in a koih hi-in, ta te in amau thu mang ding a, Nu leh Pa te in ta te lamlak ding hi ci-in Laisiangtho in hong theisak hi. Zi te in a pasal te thu mang ding a, Pasal te in zi te tungah ngongtat lo-in ki-it khawm ding cihna hi. Innkuan sungah aana nei kei ni. Ki-it ni. Thu ki mang ni. Thu kikum ni. Pasian kiangah I tu I ta khang dongin I ngah ding thuphate ngenkhawm ciatni.