Homily By Rev. Fr. David Lian (Feb 21.2.2022, Mon)

Mk 9: 14-29
Tuni I sim Lai Siangtho lungngai lehang, Pasian in eite khempeuh ama sungah upna picingna leh ama deihna tawh ki tuak aa mipil banga I hih ding hong deih hi. Adiak diakin eite in Pasian thu tawh ki tuak aa, Pasian thukham te zui aa, Pasian deihna bangin I gamtat ciangin eite in mipil I hi hi.
Tuni Lai Siangtho masa sungah Misiangtho James in “No te lak ah mipil a om leh tua te in amau pilna pen ahoih nuntakna, apha nuntakna tawh lak hen. Kiniamkhiatna tawh nungta hen. Amau pilna pen gamtatna tawh nungta hen, lak khia hen” ci-in ong hilhna thu I mu hi. Leitungah mipil tam mahmah na pi, Misiangtho James ii ong gen thu tawh ki tuak a nungta mipil pen tawm mahmah kha in ka um hi.
Tua ahih manin eite khempeuh in leitung ah mipil, mihoih mipha I hih a leh Misiangtho James ong gen thu tawh ki tuak a I gamtat ding thupi hi. A masa in gamtatpha nuntakna tawh I nuntak ding thupi hi. Pasian um in, Pasian muangin ama pilna theihna te sangin Pasian a muangzaw, Pasian tungah a kinga, upna a nei te pen Pasian sungah nuntakna pha anei ahi hi. Eite khempeuh zong Pasian sungah mipil I hih ding, leitung ah mipil in ong ki ciapteh kei hang Pasian sungah mipil, mi hampha I hi hi.
Tua banah kiniamkhiatna I neih ding kisam hi. Tu hunah mipil, mihau tam mahmah in ahih hangin kiniamkhiatna ki nei khol lo hi. Ahi zongin eiten I nuntakna ah Misiangtho te nuntakna etteh in, a diakdiak in Tonu nuntakna en lehang Pasian tungah upna nei-in, vantungmi in ama kiang thu a zaksak ciangin na deih bangin kei tungah hong piang ta hen ci-in kiniamkhiatna tawh a sangna thu I mu hi. Tua ahih manin eite khempeuh kiniamkhiat in Pasian muang hi lehang Pasian in thupha hong pia ding hi. Laisiangtho sungah zong a ki pahtawi mite ki lamsang ding aa, a ki liansak mite pen ki nenniam ding hi a cih mah bangin kiniamkhiatna tawh nungta lehang tua in Pasian sungah mipil mi hampha ahi hi.
Tua ciangin gamtatna pha tawh I nuntak ding ki sam hi. I pilna, I siamna te pen gamtatna pha, nuntakna pha tawh I lak siam ding kisam hi. Misiangtho James in “gamtatna om lo upna in a si hi” a cih mah bangin I pilna, I siamna, I hoihna te pen mite phattuam na dingin zang kei lehang tua te in manphatna om lo hi. Mipil taktak, mi hampha taktak hi zo lo ding hi hang. Tua ahih manin Pasian ong piak I hoihna, I pilna, I siamna te pen mite phattuam na ding a sem thei, zang khia thei lehang tua in Pasian sungah mipil, mi hampha I hi hi.
Tua ahih manin tuni I nuntakna ah I innkuan sung, ki pawlna tuamtuam te ah ahi zongin hazatna te, aituam lungsim te I neih leh tua te in pilna hi nai lo hi. Tua te in leitung thu, ganhing vai hi lel hi. Tua hi in Pasian deihna pilna in bang hiam? Siangtho na, kilemna, khat leh khat dik na, khat leh khat thu ki ngaihsut pihna te, hehpihna te, mite adingin nahoih napha sepna, deidan om lohna, khat leh khat kineihkhemna om lohna, khat leh khat mawh kimaisakna te ahi hi. Hih thumanpha te lungngai a, I nuntak a, I zuih a leh pen eite in Pasian sungah mipha, mi hoih te hi ding hi hang. Tua ahih manin eite in mihoih mipha, I hihna te I gamtatna tawh a lak khia zo Christian te I hih zawh nangin tha kong pia nuam hi.
Lungdamna Lai Siangtho en lehang, Topa Jesu in dawi lut mikhat a damsakna thu I mu hi. Nungzuipi te in hi dawi lut mipa pen damsak zo lo uh hi. Hawlkhia zo lo hi. Tua ahih manin Topa Jesu in nungzuipi te kiangah note tawh bang tanvei hong om khawm ding ka hi hiam? Bang hangin note in upna ki cian nei nai lo na hi uh hiam ci-in gen hi. Bang hangin nungzuipi te dawi hawlkhia zo lo hiam cih leh Pasian piak pilna siamna pen amau a bangin ngaihsun in Pasian tungah ki ngak sangin amau pilna, theihna te tungah a kingakna te a tam luat man ahi hi. Tua ahih manin na khempeuh ei theihna, ei pilna te masak lo-in Pasian hihtheihna I masak ciang na khempeuh a piang theih lam I phawk ding ki sam hi. Tua banah upna picing I neih ding Topan hong deih hi. Tua khit ciangin nisim in thungetna tawh Pasian tawh I ki zop ding Topan hong deih hi.Pasian tawh kizomin amah tawh omkhawm lehang ama hong piak thupha te khang semsem in mite tungah zong Pasian hoihna phatna te a lakkhia zo te suak ding hi hang.