Homily By Rev. Fr. David Lian (Feb 14.2022, Mon)

Mk 8: 11-13
Tuni nuntakna hong pia Pasian kammal lungngai lehang, Pasian thu sungah tha hong pia in Pasian deihna bangin I nuntak ding pilna tha hong pia hi.
Nungzui John gelh Laisiangtho masa sung pan bang mu I hiam cih leh “Note in haksatna te pen lungdamna in mu un. Na upna uh kisit in note in tua upna ii ze-et na nathuak na hang un picingna, kipna te na ngah ding uh hi” ci-in hong gen hi. Eite khat ciat ii din mun ciat ah haksatna om hi. Tua I haksatna te pen lungdamna in sang thei in hi lehang, tua te thuak zo in gualzawhna ki ngah ding hi.
Lungdamna I cih pen (gentehna in) Laiphi aa I ong khit ciang I kah lai-in I haksatna te khempeuh pen bangmah in ki mu nawnlo hi. Misiangtho Paul in bang ci hiam cih leh (Rome 8: 18) ah “Tu laitak a ka thuak haksatna te pen mai aa ka ngah ding vangliatna, minthanna te tawh ka ngaihsut ciangin bangmah cihtak ka sa kei hi” a cih mah bangin eite in tu laitak I thuak gentheih haksatna te khempeuh zong Pasian in mailam ah thupha hong piak nopna, Pasian deihna bang aa thupha I ngah nading zong hi kha ding hi. Tua ahih manin eite in I haksatna te khempeuh lungkia lo aa, Pasian muangin Pasian thu tawh kalsuan khawm lehang Pasian in thuakzawhna, gualzawhna hong pia ding hi.
Tuni Laisiangtho masa sungah pilna a kisam mite in Pasian kiangah ngen hen, Pasian in ong pia ding hi ci-in tel takin hong gen hi. Leitung, Vantung, Vannuai theihna in pilna hipah lo hi. Na I theihna in a thei bek hi aa a pil hi nailo hi. Pasian theihna, thuman theihna, Pasian deihna banga gamtatna, kilemna ki-itna te lunggulh aa tua te ngah na ding nasem in nuntakna in pilna hi. Thuman thei aa tua thuman a ding na asem te in mipil ahi hi. Pasian thu sungah nuntakna in pilna hi.
Lungdamna Lai Siangtho sungah Pharisee te in Topa Jesu kiangah pai-in na lamdang ngen uh hi. Amah a ze-et nopman ahi uh hi. Ahi zongin Topa Jesu in amaute nget na lamdang na pia lo hi. Topa Jesu in “Tu lai khang mite in na lamdang ngen uh hi. Ahi zongin bang mah ki pia lo ding hi” ci-in amaute gen in paisan hi.
Banghang in Topa Jesu in amaute na lamdang lak lo hiam? Pasian in amaute’ ngetma in na lamdang tampitak bawl hi. Ahi zongin Pharisee te in um lo-in, lungtang khauhin awlmawhlo ahih man hi. Eite khempeuh zong Pasian kiangah na lamdang a ngenngen te hilo zaw in Pasian um in, muangin ama tungah ki-nga masa lehang nisim I nuntakna sungah na lamdang ki mu thei ki tel thei ding hi.
Misiangtho Mother Theresa in mizawngte mi cimawh te amuh ciangin amaute sungah Topa Jesu om hi ci-in na gen hi. Tua ahih manin I nuntakna sungah upna nei masa leng na lamdang, Pasian nasepna tampitak ki mu thei hi. A diakdiak in ei Catholic Pawlpi te adingin nisim Missa biakpiakna ah I ki hel na ah Khomun in Topa Jesu Pumpi hong suak hi. Lenggahzu in Topa Jesu si hong suak hi. Hi in nisim um in a sang eite khempeuh in na lamdang nisim a mu I hih lam zong I theih ding thupi hi.
Tua ahih manin eite khempeuh in upna nei masa in, upna picingna te tawh kalsuan lehang I nuntakna ah Pasian nasepna na lamdangte a mu thei te hi ding hi hang. Tua ahih manin eite in gam buaina hangin lauhna patauhna, haksatna buaina te om mah taseleh tua te khempeuh Pasian tungah ap in, Pasian tungah ki-nga in Pasian muangin Pasian deihna bangin I nuntak tawntung zawh nangin khat leh khat tha ki pia in thungetna tawh mailam ah ki huh in kalsuan khawm ni.