Homily By Rev. Fr. David Lian (Dec 10, 2021)

Mt 11 : 16-19
Tuni Lungdamna Lai Siangtho sungah Topa Jesu in ama hun a mite nuntakna, bangci lungsim nei, bangci nuntak cih lungsim te naupangno te tawh genteh hi.
Naupang cihte pen gilkial leh dah leh kap ziau ahi zongin ama ii ut bangin a gamta, ngaihsut nate a picing nailo hi. Tua mah bangin Topa Jesu hun lai a mite pen tua bang lungsim aneite ahi uh hi. Tua leh tu hun aom eite in bangci lungsim nei ih hi hiam? Ei leh ei ih kisit tel ding thupi ka sa hi. Ngaisun phapha leng Topa Jesu hun a mite zong tu hun mite mah tawh ki bang hi. Banghang hiam cih leh eiten gualzawhna ih ngah ciang, thupha ih ngah ciangin Topa tungah lungdamkoh ding zong kiphawk khol lo, haksatna ih tuah ciang, ze-etna buaina, nawngkaaina a om ciang Pasian beelin Pasian tungah ki-nga in, Pasian tungah thungen ning cilo zaw in, mundang, mun tuamtuam ah kipai thei zaw hi.
Hi te en lehang Topa Jesu hun lai aa mite mah tawh ki banga, bang zahta in Pasian thu ih zak hang, Pasian phat tuanlo, Pasian tungah lungdam ko thei tuan lo ih hih leh pen apicing lo naupangte bangin, ngaihsutna picing anei nailo, upna picing anei nailo te tawh ki bang ding hi hang. Tuni eite in ih hihna te, ih thanemna te ih theih ciangin Topa Jesu kiangah pai aa, ama tungah ki-ngak ding Topa Jesu in ong deih hi.
Topa Jesu nung azuite in khuavak nuntakna ngah ding hi ci-in Lai Siangtho sungah ih zak mah bangin ih nuntakna ah Topa Jesu nungzui, thuman nungzui, thuman sungah anungta zo te leh Pasian sungah anungta, ih hihna bangbang kisang thei aa, midangte hihna, thanemna te zong, a sang thei semsem, Topa Jesu hong pai na ah zong hoihtak aa, kigingsa aa amuak zo te ih hih na ding thungen ciatni.