Homily By Rev. Fr. David Lian (9.1.2022, Sun)

(Lk 3: 15-16,21-22)
Topa Jesu in ei mawhnei mite hong tankhia dingin Pasian tapa ahihna hong ki langh sak hi. Tuni Lungdamna Laisiangtho sungah Topa Jesu tuisawpna I muh mah bangin amah in Pa Pasian tawh pumkhat a suakna, ei mawh nei mite hong tankhia dingin hong paina thu, Pasian in a it a tapa ahihna thu te hong kilangh sak mahmah hi.
Eite khempeuh zong tuisawpna a sang khin I hih mah bangin Pasian in hong it, Pasian thupha a sangte I hih na zong I phawk ding kisam hi. Topa Jesu in tuiphumpa John tungpan tuisawpna na sang hi. Tuiphumpa John in Topa Jesu hong pai na ding lampi na sial, Pasian thu na tangko hi. Ama tuiphumna in kisikkikna lim alak tuiphumna ahi hi. John ii tuiphumna in mawhmai sakna hong pialo hi. Khasiangtho zong hong pia lo hi. Pasian tanu tapa zong hong suaksak lo hi.
Ahi zongin eite in Topa Jesu ii hong piak tuisawpna I sanna hangin mawhmaina te ngahin, Khasiangtho sangin, Pasian tanu tapa te hong suaksak thei ahih manin eite khempeuh zong Topa Jesu bangin Pasian tanu tapa te I hih mah bangin, Pasian it te I hih manin Pasian zong I it kik theih ding kisam hi.
Tuiphumpa John in ama nasep ahi, Topa Jesu hong pai nading lam asial ahih mah bangin amah in Topa Jesu hong kilangh sak, teci hong pang hi. Eite khempeuh zong Tuiphumpa John bangin I nuntakna ah Topa Jesu a kilanghsak semsem thei te, mite tungah Topa Jesu a puakzo te I hih ding kisam hi.
Topa Jesu in tuisawpna a san laitak in vantung kihong in hih in ka it ka tapa hi, ama tungah ka lungdamna om hi ci hi. Eite khempeuh zong tuisawpna I san laitakin van tung pan aw gingte I beng pan I zakloh hang, eite in Pasian tanu tapa, Pasian ii lungnopna I hihna te I phawk ding kisam hi. Pasian in a it a tapa a cih in koi dan hiam? Hih leitungah en lehang I it, I ngaihte haksatna tuaksak lo ding, hoihtak kem cing ding, buaina omlo ding, noptak a om ding bangin I ngaihsun ding hi.
Ahi zongin Pasian it a tapa in bang hiam cih leh Pasian thumang, Pasian na semin, leitung mite hong honkhia ding, thuman thutak hong puak dinga hong pai pa, Pasian deihna banga a sempa in Pasian lungkimna hi. Tua ahih manin eite khempeuh Pasian thu zui a, thuman thutang tawh na I sep leh Pasian in a it a tanu a tapa te suak thei ding hi hang.
Eite in tuisawpna I sanna hangin, tuisawpna I san khit a kipan, tuiphumpa John bangin lungdamna thu a tangko, mite tungah Topa Jesu a puak thei, kiniamkhiatna, thuman thutang tawh a nungta zo semsem te I hih zawh na dingin thu ngen ciatni.