Homily By : Rev. Fr. David Lian (6. 12. 2021 , Mon)

Lk 5: 17-26
Thuzui ulehnau te tuni ih biakpiakna hun ah Adventu hun ahih mah bangin eite in Topa Jesu hong pai ding ngakin ih om na hun ahih mah bangin ih mawhnate kisik in, thuphate bawla, hoihtak leh a siangtho takin Topa Jesu ih dawnzawh na dingin ih kigin ding a thupi mahmah ahi hi.
Eite nisim nuntakna ah ih nasepna, ih hawh ih ciahna, ih kithuahpih lawm leh gual, ih nasepna tungtawnin ahi zongin Topa Jesu hong pai lam, eite hong ompih lam ih phawk ding thupi mahmah hi. A diakdiakin Missa biakpiakna ah ih ki hel ciangin Topa Jesu thu te, Topa Jesu kammal te ngai-in ih zak ciangin, ama pumpi Siangtho Pumpi ih san ciangin zong Topa in eite hong ompih in eite in amah a sang ih hih lam zong ih phawk ding thupi mahmah hi.
Tuni Lungdamna Lai Siangtho sungah Topa Jesu in pumzaw mikhat adamsakna ih muh mah bangin hih mi li te in amau lungsim ahi, mi hehpih theihna, mi itna, Topa Jesu kiangah mi’ haksatnate a puak thei, a pulaksak thei ahihna lungsimte ih neih ding leh Pharisee te bangin lungsim hoihlo te neilo ding hi hang. A hoihlo te paaikhia in ahoih te ih nuntakpih ding kisam hi. Ih nuntakna ah nahoih napha sepna tawh Topa Jesu hong pai nading, hoihtak aa, siangtho tak aa, a kigingkhol te ih hih zawh na dingin hanciam tawntung ni.