Homily By Cate. Joseph Hau Kap (Feb 24.2022, Thur)

Mk 9: 41-50
Tuni Lungdamna Laisiangtho sungah Topa Jesu in keima min hangin tuisik hai khat a hong suah peuhmah in pahtak thaman sang loin om lo ding hi ci-in hong gen hi. Pasian minsuanga I sepna khempeuh, I gen thu te khempeuh pen Pasian in nial loin Pasian gamzaina, Pasian thu a tangko ko ki suak hi. Tua banah Pasian nasem mikhat tuisik hai khat suahna zong Pasian in kei tungah hong bawl hi a cih mah bangin Pasian min tawh thupha bawlna te I neih theih na dingin tuni Topa Jesu mahmah in ong hanthawn hi. Tuisik in bang mah man neilo ahih hangin Jesu min tawh thupha I bawlna khempeuh man nei hi cih thu hong gen hi.
Tua thamlo in ‘Kei hong um hi naupangno khat mawhna abawlsak mi peuhmah in a ngawngah an-ngawina suang lianpi khat khihin tuipi sungah kikhia leh, ama adingin hoihzaw ding hi’ ci-in hong gen leuleu hi. Naupangno cih ciangin asia apha akhen thei nailo naupangte leh Pasian thu ahi zongin pilna tuamtuam a nei nailo mikhat peuhpeuh pen naupang tawh kibang hi. Nu leh Pa te hitaleh sia, siama te hitalehang, eite khat ciatin tua bang naupangte bang lampi hilh ka hiam? Thuman thutak hilh ka hiam? Lungsim hoih, lungsim siangtho tawh a khantoh theih nading ei amaute amakaih mite khempeuh in lamhoih lampha a tot theih na dingun I nuntakna mahmah tawh I lak ding hong deih hi.
Mi khempeuh Ci sawh bangin kisawh ding a cih ciangin mi khempeuh in gimna, haksatna thuak ding cihna hi. Tua gimna haksatna I thuak ciangin bang lungsim nei ding I hi hiam cih leh Topa Jesu mahmah zong eite hong hotkhiat na dingin gimna haksatna thuak hi. Tua ahih manin Topa Jesu in vangik pua in a gim mite aw, kei kiangah hong pai un. Ka hakkol hong pua un. Ka hakkol puaknop mahmah aa, ka van zong a zaang hi a cih mah bangin eite in Ci banga al mite I hi aa, mei tawh hong ze-et ding ahih manin tua bang gimna haksatna I tuah ciangin Jesu nungngak ding hilo in, maingat in ama kiang zuan dingin hong deih hi.
Tua ahih manin Christian nuntakna, Ci-al nuntakna ah Ci in a alna bei leh a kimanna omlo a hih mah bangin ei Jesu a um Christian te in Ci banga mite ii nopsakna, kilemna ahi dingin Pasian sapte, Pasian pawlpi te I hih manin tuni Ci-al bangin I nuntak zawh na dingin nisim I nuntakna te lungngai in kipuahpha ni.