Homily By Cate. Joseph Hau Kap (Feb 1.2022, Tue)

Mk 5: 21-43

Tuni Lungdamna Laisiangtho in Jesu in amah a um mite khempeuh ading, na hoih sepsak tawntung hi cih ong thei sak nuam hi.

Topa Jesu in tuipi gei-ah thu gen in a om laitakin Jairus a ki ci mi khat ong pai-in, Jesu khe phungah bok aa, “Ka tanu si dekdek in om hi. Hong pai inla, ama tungah na khut nga leteh damkik in nungta ding hi” ci-in thum phapha hi ci hi. Thu I nget ciangin khat vei peuh nget ding hi lo aa, ngen tawntung cih Topa’n hong phawksak nuam hi. Jairus tanu veh dingin Topa Jesu a paina lampi ah mipi tam mahmahin tua kawmkal ah kum (12) sung tawntung siluang natna anei numei khat in Jesu hong pai hi cih a zak ciangin apuanmong tepkaai khat bek zong khoihkhak leng dam ding hing cih upna lianpi, muanna lianpi tawh hong zuan hi.

Tua munah ute naute, Topa’n upna hong ngen hi. Up ding ong deih hi. Tua numei nu in Topa Jesu puanmong a lawng ciangin anatna pan damna angah lam ki thei pah hi. Jesu in kua in ong lawng a hi hiam ci-in ong khua dak kawikawi hi. Nungzuite in mi hizah tam a, kua in ong lawng hiam ci-in a kan pen lamdang sa uh hi cih thu zong I mu hi. Mi tampi in nawk kha, khoih kha mah ta leh upna leh muanna takpi tawh hi lo ahih manin Jesu in thei kha se lo aa, tua numei nu in ahih leh upna leh muanna takpi tawh khoih a hih manin Jesu in phawk hi.

Eite zong thu I ngetnget hangin upna takpi, muanna takpi tawh I ngen hiam? Ong damsak takpi ding hi cih lametna ka nei hiam cih I ki teldot ding zong kisam ka sa hi. Jairus tanu veh dinga apai na pan siluang natna nei nu in zong damna ngah hi. Jesu I sapna ah ei ading bek hi lo-in mi adingin zong phattuamna om hi cih I phawk ding zong kisam mahmah hi. Topa Jesu in “Kei mah in lampi ka hi hi, nuntakna ka hi hi, thuman thutak ka hi hi” ci ahih manin Jesu lampi, nuntakna, thuman thutak pen kan ciat aa, tua sungah a lungmuang kha muang thei dingin Topa Jesu in hong gen hi cih phawkin Jairus mah bangin muanna lianpi tawh Topa Jesu a sam te, a ko te, a thum te I hih ding kisam hi. Kum (12) sung siluang natna aneinu bangin upna takpi tawh, muanna takpi tawh amah I zuat ding zong Topa’n ong deih hi.

Topa Jesu in thupha ong pia nuam, ong damsak nuam, ong kha muangsak nuam hi mah taseleh ei mahmah zong a kisam I hih lam ong telsak nuam hi. Bang zahta in Jesu um mah taleh a upna pan, a om na pan pai kei hen la, Jesu puan va lawng kei leh zong tua numei nu dam lo kha mai ding hi. Tua ahih manin upna leh gamtatna ki khen thei lo hi.