Good Friday Ni Lungdamna Lai Siangtho simna 2022

Lungdamna Laisiangtho: Siangtho Ninga Ni: Jn 18: 1- 19:42;        

1. Jesu in hih thute a nget khit ciangin, a nungzuipite tawh Kidron kici lui gal khat ah pai uh a, amah le a nungzuipite tua lai-a om huan sung khatah a lut uh hi.

2. Jesu le a nungzuipite tua lai-ah pai pahpah uh ahih manin tu-in amah a lehhekpa Judas in zong tua mun a thei hi.

3. Tua ahih manin Judas in galkap pawlkhat, siampi makaite le Pharisee-te makaihin meivak, meilah le hiamte tawi-in tua munah hong pai uh hi.

4. Jesu in ama tunga thu piang ding khempeuh thei khin ahih manin amaute’ kiangah pai-in, “Note in kua zong na hi uh hiam?” ci-in a dong hi.

5. Amaute in, “Nazareth mi Jesu ka zong uh hi,” ci-in a dawng uh hi. Jesu in, “Kei, tua pa ka hi hi,” a ci hi. A lehhekpa Judas zong amaute tawh a ding khawm hi.

6. Jesu in, “Kei tua pa ka hi hi,” a cih ciangin amaute nungkinin lei-ah a puk uh hi.

7. Tua ciangin Jesu in, “Note in kua zong na hi uh hiam?” ci-in amaute a dong kik hi. Amaute in, “Nazareth mi Jesu ka zong uh hi,” a ci uh hi.

8. Jesu in, “Kei, tua pa ka hi hi, ci-in kong gen khin zo hi. Kei hong zong na hih uh leh hih mite paisak un,” ci-in a dawng hi.

9. Hih in, “Kei nong piak mite khat beek ka mansuah kei hi,” a cihna thu a tangtunna ding ahi hi.

10. Tua ciangin Simon Peter in a namsau puak a dawh khit ciangin, siampi lianpa’ silapa sat a, a taklam bil a satkhia hi. Tua silapa’ min Malchus ahi hi.

11. Jesu in Peter’ kiangah, “Na namsau a paii ah siat kik in. Pa in kei hong piak khitsa hai dawn lo ding ka hi hiam?” a ci hi.

Siampi Lianpa mai-ah Jesu

12. Tua ahih manin galkapte a kipan galkap mangpa le Jew upa na semte in Jesu man uh a, khau tawh a hen uh hi.

13. Amaute in Annas’ kiang ah a paipih masa uh hi. Annas in tua kum a siampi lianpa Caiaphas’ sungpa ahi hi.

14. Caiaphas in, “Mipite’ tang dingin mi khat’ sihna in a hoihzaw hi,” ci-a Jew mite a thuhilhpa ahi hi.

Peter in Jesu Nial
15. Simon Peter le nungzuipi dang khat in Jesu’ nung a zui uh hi. Tua nungzuipi pen siampi lianpa’ meltheih ahih manin siampi lianpa’ huang sung dong Jesu tawh a tonkhawm hi.

16. Ahi zongin Peter a pualam kongpi ah a ding hi. Tua ahih manin siampi lianpa tawh a kimel theih nungzuipipa paikik a, kongpi a cing numei’ kiangah a gen ciangin Peter a lutpih hi.

17. Kongpi a cing numeinu in Peter’ kiangah, “Nangmah in hih mipa’ nungzuipite’ lakah khat hilo na hi hiam?” ci-in a dong hi. Amah in, “Ka hi kei hi,” ci-in a dawng hi.

18. Tu-in Siampi lianpa’ silate le palikte in khuadam ahih manin meiphual cih uh a, tua kimkot ah mei awi-in a ding uh hi. Peter zong amaute tawh ding khawmin mei a awi hi.

Siampi Lianpa in Jesu Thudong

19. Tua khit ciangin siampi lianpa in ama nungzuipite’ thu le ama thuhilhna thu Jesu’ kiangah a dong hi.

20. Jesu in amaute’ kiangah, “Leitung mite’ mai-ah a kilangin ka gen khin zo hi. Jew mite’ kikhopna innte le biakinnpi sungah thu ka hilh tawntunga, thu ka sim hilh ngei kei hi.

21. Bang hangin kei hong dong na hi hiam? Ka thugen hong zate’ kiangah va dong un. Amaute in ka thugente a thei uh hi,” ci-in a dawng hi.

22. Tua bangin a dawn’ ciangin, a kianga ding palikte khat in, “Tua bangin siampi lianpa dawn kik ding kilawmsa na hi hiam?” ci-in Jesu’ maitang a beng hi.

23. Jesu in, “A man lo ka gen leh, ka khialhna hong lak in. Ahi zongin aman ka gen leh bang hangin hong beng na hi hiam?” ci-in a dawng kik hi.

24. Tua ciangin Annas in amah hensa-in siampi lianpa Caiaphas’ kiang ah a paisak hi.

Peter in Jesu Nial kik

25. Tu-in Simon Peter, mei awi-a a din laitakin mi pawlkhat in, “Nang, ama nungzuipite’ lakah khat hilo na hi hiam?” ci-in a dong uh hi. Peter in, “Ka hi kei hi,” ci-in a nial hi.

26. Peter in a bil a satsakpa tawh a kibeh, siampi lianpa’ sila khat in Peter’ kiangah, “Nang, tua pa tawh huan sungah hong mu hilo ka hi hiam?” a ci hi.

27. Peter in, “Ka hi kei hi,” ci-in a nial kik hi. Tua khit phetin ak a khuang hi.

28. Tua khit ciangin amaute in Caiaphas’ kiang pan Rome mite’ mangpa’ inn ah Jesu a paipih uh hi. Tua hun pen zingsang tung ahi hi. Jew mite in Paisan Pawi an a nek theihna dingun amau ngeina om bangin siangtho nuam uh ahih manin mangpa’ inn sungah lut lo uh hi.

29. Tua ahih manin amaute’ kiangah Pilate paikhia a, “Hih mipa na mawhmatna uh bang ahi hiam?” ci-in a dong hi.

30. Amaute in, “Hih mipa in mawhna lian nei lo hi leh, na khut sungah kong pia kei ding uh hi,” ci-in a dawng uh hi.

31. Pilate in amaute’ kiangah, “Note mah in amah paipih unla, na thukham uh a om bangin thu na khen un,” a ci hi. Jew mite in, “Kote in mi khatpeuh tungah sihna ding thukhen theihna thu ka nei kei uh hi,” ci-in a dawng uh hi. (

32. Bangci banga sihna thuak ding cih, Jesu in ama sihna ding thukhenna a tangtunna dingin hih thu a piang ahi hi.)

33. Tua khit ciangin huang sungah Pilate mangpa lut kik a, Jesu samin, “Nangmah in Jew mite’ kumpipa na hi hiam?” a ci hi.

34. Jesu in, “Nangma thu tawh hih banga hong dong na hi hiam? Ahih kei leh, midangte khatpeuh in keima thu hong gen ahi hiam?” ci-in a dawng hi.

35. Pilate in, “Keimah in Jew mi hi lo ka hi hiam? Nangma minamte le siampi makaite in keima’ khut sung ah nang hong pia uh hi. Nang in bang tatkhialhna nei na hi hiam?” ci-in a dong hi.

36. Jesu in, “Keima kumpi gam in hih leitung hi lo hi. Keima kumpi gam in hih leitung hi leh, Jew mite’ khut sung ka tun’ lohna dingin ka nungzuipite in a do ding uh hi. Ahi zongin ka kumpi gam in hih lai-ah om lo hi,” a ci hi.

37. Pilate mangpa in Jesu’ kiangah, “Tua bang ahih leh nang, kumpi na hi hiam?” ci-in a dong hi. Jesu in, “Na cih bangin keimah in Kumpi ka hi hi. Bang hang hiam cih leh Keimah in hih thu hangin kong suak a, thuman thutak teci a pang dingin hih leitung ah kong pai hi. Thuman thutak a deih mi khempeuh in keima aw a ngai uh hi,” a ci hi.

38. Pilate in Jesu’ kiangah, “Thuman thutak in bang ahi hiam?” ci-in a dong hi.

Jesu Sih ding Thukhenna
Pilate in hih thu a gen khit ciangin Jew mite’ kiangah paikhia kik a, “Hih mipa’ tungah mawhna ka mu kei hi.

39. Ahi zongin Paisan* Pawi hun sungin mi khat ka khah ding ngeina khat a om hi. Tua ahih manin note’ kiangah Jew mite’ Kumpipa ka khah ding na deih uh hiam?” ci-in amaute a dong hi.

40. Amaute in, “Hih mipa khah ding ka deih kei uh hi; Barabbas na khah ding ka deih uh hi,” ci-in a kikokik uh hi. Tu-in Barabbas in misuam migilo khat ahi hi.

Jn. 19:1-42 

1. Tua khit ciangin Pilate in Jesu a sapkhiatsak khit ciangin a satsak hi.

2. Galkapte in ling tawh kumpi lukhu phanin a lu-ah a khusak uh hi. Amaute in puansan dup a silhsak khit uh ciangin amaute ama kiangah pai-in,

3. “Jew mite’ Kumpipa, na ci dam ta hen!” ci-in a maitang a betsak uh hi.

4. Pilate va paikhia kik a, amaute’ kiang ah, “En un , Hih mipa’ tungah mawhna bangmah ka muh loh na theihna dingun note’ kiangah kong lakkhia hi,” a ci hi.

5. Tua ahih manin Jesu in ling lukhu khusa-in, puansan dup silhin hong paikhia hi. Pilate in amaute’ kiangah, “Mipa hi lai-ah om hi,” a ci hi.

6. Siampi makaite le palikte in amah a muh uh ciangin, “Singlamteh tungah that in! Singlamteh tungah that in! ci-in a kiko uh hi. Pilate in, “Nomau mah in amah kaikhia unla, singlamteh tungah that un. Bang hang hiam cih leh keimah in ama tungah mawhna ka mu kei hi,” a ci hi.

7. Jew mite in, “Kote in Thukham ka nei uh hi. Amah in, ‘Pasian’ Tapa ka hi hi,” ci ahih manin tua Thukham tawh kizui-in amah in sihna a thuak dingin kilawm hi,” a ci uh hi.

8. Tu-in Pilate in hih thu a zak ciangin a lau semsem hi.

9. Tua ahih manin amah innpi sungah lut kikin, “Nang koi pan hong pai na hi hiam?” ci-in a dong hi. Ahi zongin Jesu in kam khat beek dawng lo hi.

10. Tua ahih manin Pilate in, “Kei hong hopih nuam lo na hi hiam? Keimah in nang kong khahna ding thu ahi zongin, singlamteh tungah thahna ding thu ahi zongin thuneihna ka neih lam thei lo na hi hiam?” a ci hi.

11. Jesu in ama kiangah, “Tung lam pan thu na ngah kei leh, kei’ tungah bangmah hih theihna thu na nei kei ding hi. Tua ahih manin nangma’ khut sungah kei hong piapa’ mawhna a lianzaw hi,” a ci hi.

12. Tua-a kipan Pilate in Jesu a khahna ding a hanciam hangin Jew mite in, “Hih mipa na khahkhiat leh Caesar’ lawm na hi kei hi. Kumpipa ka hi hi, a kici peuhmah Caesar a langpang ahi hi,” ci-in a kiko uh hi.

13. Tua thu a zak ciangin Pilate in Jesu paikhiatpih a, Hebrew kamin ‘Gabbatha’ kici ‘Suangphah’ tungah a tu hi.

14. Tu-in Paisan pawi Kiginkholh ni, sunkim nai sawm le nai nih* pawl ahi hi. Pilate in Jew mite’ kiangah, “Na kumpipa uh hih lai-ah om hi,” a ci hi.

15. Amaute in, “Amah that in, amah that in, singlamteh tungah that in!” ci-in a kiko uh hi. Pilate in, “Na kumpipa uh singlamteh tungah that ding ka hi hiam?” ci-in a dong hi. Siampi makaite in, “Caesar longal adang kumpi ka nei kei uh hi,” ci-in a dawng kik uh hi.

16. Tua ciangin, Pilate in singlamteh tungah thah dingin amaute’ khut sung ah amah a pia hi.

Singlamteh tungah a Kikhaina
17. Tua ahih manin amaute in Jesu a paikhiatpih uh hi. Jesu in a singlamteh amah mah in pua a, Hebrew kamin ‘Golgotha’ kici ‘Lutangguh Mun’ a kicihna ah a paikhia hi.

18. Tua lai-ah amaute in singlamteh tungah amah a khai uh hi. Amaute in Jesu a laizang ah khai uh a, adang mi nih zong ama lang tuakah a khai uh hi.

19. Pilate in theihsakna lai khat gelhsak a, singlamteh tungah a suang hi. Tua lai in, “Jew mite’ Kumpipa, Nazareth mi Jesu” ahi hi.

20. Jew mi tampite in hih lai kisuang a sim uh hi. Bang hang hiam cih leh, Jesu singlamteh tunga a kikhailupna mun khuapi tawh kinai-a, tua theihsakna lai, Hebrew, Latin le Greek kamin kigelh hi.

21. Tua khit ciangin, Jew mite’ siampi makaite in Pilate’ kiangah, ‘Jew mite’ Kumpipa, ci-in gelh kei in; hih mipa in keimah in Jew mite’ Kumpipa ka hi hi, kici hi,’ ci-in gelh in,” a ci uh hi.

22. Pilate in, “Ka gelhkhitsa in ka gelhkhitsa ahi hi,” ci-in a dawng hi.

23. Galkapte in singlamteh tungah Jesu a khai khit uh ciangin a puante la-a phel li suahin, phel khat ciatin hawm uh a; a puanak zong a la uh hi. Hih puanak kikhui loin a lu pan a taw dongin a kiphan ahi hi.

24. Amaute in, “Hih puan balkek kei ni, a ngah ding pen aisaan ni,” a kici uh hi. Hih thu Lai Siangtho sungah, “Amaute’ lakah ka puante hawm uh a, ka puan tungah ai a saan uh hi,” ci-in a kigelhna a tangtunna ding ahi hi.

25. Tua in Galkapte’ bawl ahi hi. Jesu’ singlamteh gei-ah a nu le a nu’ sanggamnu, Clopas’ zi Mary le Magdala khua mi Mary-te a ding uh hi.

26. Jesu in a nu le a it a nungzuipa a kianga ding a muh ciangin a nu’ kiangah, “Numeio aw, hih lai-ah na tapa a om hi!” a ci hi.

27. Tua khit ciangin a nungzuipipa’ kiangah, “Hih lai-ah na nu a om hi!” a ci hi. Tua hun a kipanin tua nungzuipipa in amah a inn ah a kem hi.

28. Tua khit ciangin Jesu in na khempeuh kizo khin hi, cih a theih ciangin, Lai Siangtho sunga kigelh a tangtunna dingin, “Ka dang a taak hi,” a ci hi.

29. Tua lai-ah leenggahzu thuk beel khat a om hi. Amaute in tuihupna khat tua sungah a diah khit uh ciangin, pumpeeng dawnah suangin ama muk ah a tah uh hi.

30. Jesu in lenggahzu a ngah khit ciangin, “Na khempeuh kizo khin ta hi!” ci-in a lu kunsukin a si hi.

Jesu’ Pang Kisun

31. Tua ni in Kiginkholh Ni hi a, Sabbath ni-in a luangte singlamteh tungah a om lohna dingin, Jew mite in Pilate’ kiangah a khe kuaitanin a luangte a lakkhiatna ding a va ngen uh hi. Bang hang hiam cih leh, tua Sabbath ni in ni thupi mahmah ni ahi hi.

32. Tua ahih manin galkapte va pai-in, Jesu tawh a kikhai khawm, a masa pa le adang khat’ khete a kuaitan uh hi.

33. Amaute Jesu’ kiang a tun uh ciangin amah si khin ta, cih a muh uh ciangin, a khete a kuaitan kei uh hi.

34. Ahi zongin galkap khat in a pang teipi tawh sun a, sisan le tui thakhatin a luangkhia pah hi.

35. (A mu mi in teci a pang hi. Ama teci panna thuman ahi hi. Amah in thuman thutak gen ahih lam thei a, note in zong na up theihna dingun teci a pang hi.)

36. Bang hang hiam cih leh, “Ama guh khat beek kikuaitan lo ding hi,” ci-in Lai Siangtho sungah a gen bangin a tangtunna ding hih bangin a piang ahi hi.

37. Lai Siangtho sung mun dang khat ah: “Amaute in a sutpa uh a en ding uh hi,” ci-in kigelh hi.

Jesu a Kivuina
38. Hih thute khit ciangin, Arimathea khua mi Joseph in Jew mite a kihtak manin a kilang loin Jesu’ nung a zui mi khat hi a; Jesu’ luang a lak theihna dingin phalna Pilate’ kiangah a ngen hi. Pilate in phalna thu pia ahih manin amah hong pai-in Jesu’ luang a la hi.

39. Hun khat lai-a, Jesu’ kiangah zan laitakin a pai Nicodemus in myrrah le aloes sathau namtui a kihel paknamtui pound za khat hong paipih hi.

40. Amaute in Jesu’ luang lakhia uh a, Jew mite’ kivuina ngeina bangin paknamtui tawh dialin a tuam uh hi.

41. Tu-in singlamteh tunga Jesu a kikhailupna mun tawh a kinaina ah huan khat om a, tua huan sungah kuamah a kivui ngei nai lohna han thak khat a om hi.

42. Tua ni pen Jew mite’ Kiginkholh Ni hi a, a nai-ah han zong om pah ahih manin amaute in tua hanah Jesu a vui uh hi.

Hi in Topa' Lungdamna Laisiangtho ahi hi.