Gimthuakna om masa lo-in, nopsakna om ngeilo hi.

Gimthuakna om masa lo-in, nopsakna om ngeilo hi. Ih Christian nuntakna ah Singlamteh ih puak lohin khamlukhu ki khu thei lo hi. Mikang paunak ah ‘no pain, no gain’ thuakna omlo pi-in ngahna om lo hi ci hi. Kawlten zong paunak khat na nei a, ‘temcHrS tompHrnf’na thuak zawh leh bek nuam na sa ding hi ci hi. Tua ahih manin na hoih khat peuhpeuh ih ngah nop leh ih piak masak kul hi cih thu ahi hi. Topa Jesu mahmah in zong sihna zo in minthan na tawh hong thawh kik na dingin nakpi takin nathuak masa phot hi. Athuak ding lamtak thei in, ahi zongin taisan lo, penglo, nungkik lo hi.

No te in kei kua hi nong ci uh hiam ci-in a dot ciangin Peter in Pasian sathau nilhpa na hi hi a cih teh Topa Jesu in mihing tapa in nasiatakin gim thuak ding hi ci-in gen hi. Topa Jesu in athuak ding te thei mah tase leh a sep ding te sem veve hi. Gim ing, tawling ci lo-in asep ding mabante mainawtin pai hi. Ei te zong Jesu nung ih zuihna ah anuamsa tawntung ding ih hi kei a, khat veivei ciangin ih tel zawhloh thu tampi tak ih nawk kha ding hi. Tua bang hun ciangin ih phawk ding thu khat in Topa in hong ompih hi, ong taisanlo, ong nusia lo bek thamlo in amah mahin tua gentheih haksatna te na thuak masa in, tua athuakna te tungah a gualzo pa ahih lam ih phawk ding thupi hi.

Eite in Jesu nung zui te ih hih manin ama tawtsa lampi ih tawt ding aman hong deih hi. Ama thuak bangin ih thuak hun zong tampi om ding hi. Ahi zongin gimthuakna in Jesu ading a tawpna hilo a, gualzawh nadingin lampi khat hi lel hi. Tua ahih manin a tawp dongin ih nisim singlamteh pua in gualzawhna lampi tawn ni. Lungkia kei ni, mai nawtni. Topa eite tawh ong omkhawm hi. Topa’n hong puakpih, hong thuakpih hi. Piakna omlo in ngahna om lo, thuakna omlo in nopsakna zong om lo hi.

Tua ahih manin ih neih sunsun Topa tungah pia masa ni. Aman hong dimkik ding hi. Haksatna te thuak tentan ni, aman hong thuakpih ding hi. Gualzawhna in eite hong ngak gige hi cih phawkni. Topa Jesu sulzui in gimna, tawlna, haksatna te a om hangin lungkia peuhmah lo-in mainawtin Topa minthanna atangte ih suah nadingin tuni a ki hanthawn ih hi hi.