Eite in khuavak ta te ih hi hi.

Lk 16 : 1 – 8
Tuni Lungdamna Laisiangtho in eite in ih neih bangmah om lo hi, sum kem te bek ih hi hi. A nei pen Pasian hi, mihaupa pen Pasian hi cih hong phawk sak hi. Nikhat ni ciangin sum neipa Pasian in sum kem eite ii sumkep zia, sep zia te hong kantel ding hi, thu hong khen ding hi cih zong hong phawk sak hi.
Tua ahih manin ih nuntakna sungah eite neih, eite kep, eite hong ki kemsak sum leh paai te, neih leh lam te, pilna siamna te pen Topa Pasian ii lungdam nading, lungkim na ding leh minthan nading in ih zat ding, ih zek ding hi cih zong hong phawk sak hi.
Topa Jesu in leitung mite in hi leitung na te ah, khuavak mite sangin agel siam zaw hi ci-in na gen hi. Eite in khuavak ta te ih hi hi, Pasian ta te ih hi hi. Tua ahih manin khuavak nate, Pasian na te ah ih gel siam ding, tuni Topa in eite khatciat khat ciat hong zawn hi cih phawk in ih nuntakna te a zang siam, a zek siam te ih hih zawh na dingin Pasian tungah ki-ap ciat ni.