Eite hong langpang lo peuhmah eite tawh a kipawl ahi hi.

Lungdamna Laisiangtho Mk 9:38-43, 45, 47-48 38.

John in Jesu’ kiangah, “Sia aw, mi khat in nangma min tawh dawite a hawlkhiat ka mu uh hi. Amah in eite hong zui lo ahih manin ka kham uh hi,” a ci hi. 39. Ahi zongin Jesu in, “Tua pa na kham kei un; bang hang hiam cih leh keima min tawh na lamdang a bawl khit phetin hong kosia pah ding mi khat zong om lo ding hi. 40. Bang hang hiam cih leh, eite hong langpang lo peuhmah eite tawh a kipawl ahi hi. 41. Bang hang hiam cih leh ken a man takpi kong genin ah, Christu’ min pua na hih manun keima min hangin tuisik hai khat a hong suah peuhmah in pahtak thaman sang loin om lo ding hi.

42. “Kei hong um hih naupangno khat mawhna a bawlsak mi peuhmah in a ngawng ah an-gawina suang lianpi khat khihin tuipi sungah kikhia leh, ama aadingin hoihzaw ding hi. 43. Na khut in mawhna hong bawlsak leh, sattan in. Khut kim nei-in a mit ngeilo meikuangpi, hell khuk sungah na kikhul sangin, khut le khe neilo in nuntakna sungah lut lecin, nang aadingin hoihzaw ding hi.

45. Na khe in mawhna hong bawlsak leh, sattan in. 47. Na mittang in mawhna hong bawlsak leh, khelkhia in. 48. Than a sih lohna, mei a mit ngei lohna hell khuk sungah mittang kim nei-in hong kikhul sangin, mittang khat guak tawh Pasian gam sungah lut lecin, nang aadingin hoihzaw hi.