"David tapa Topa Jesu aw, khua hong musak in"

Daily Homily by Rev. Fr. Andrew Go Nang (May 27, 2021)

Tuni ih sim laisiangtho in Pasian thupitna, Pasian vangliatna te hong mu sak hi. Laisiangtho masa sungah bang hong gen hiam cih leh "Pasian pilna gen zawh loh in sangin ama pilna leh a vangliatna in ama bawlsa nate tungah dim takin kimu thei hi," ci-in laisiangtho at pa in hong gen hi. Hih laisiangtho ih lungngaih tak ciangin bang hong phawk sak hiam cih leh, "Pasian in leitung aa om na khempeuh bangmah omlo panin a bawl pa leh abawl sa nate khempeuh in a ma pilna tawh bawlin a vangliatna te kilang sak aa, abawlsa nate khempeuh in ama thu mang uh hi. Hih abawlsa nate khempeuh en leng alamdang mahmah hongkepna hongcinna thuthuk mahmah te leh ama vangliatna te ih muding hi. Bang hang hiam cih leh leitungah nate khempeuh in amau namciat in om in alamdang mahmah khat le khat kizopna nei ciat uh hi.

Khat le khat a kizom lo, akip diamdiam lo na khat beek ih mu kei ding hi. Mihing te ih hih leh leivui panin hong kibawl in hih leitung aa om aki piang sak nate tungah ih pumpi nuntakna akinga ahi hi. Vantung pan guah hongzu in ih dawn ding tui ih ngah aa, tua tui te in leitang kawt sak in nuntakna pia aa, singkung lopa te hong sel sak hi. Singkung lopa te pan in ih nek ding anteh theipuan te ih ngah hi. Guahtui panin nuntakna ngah in nitaang tawh akhang singkung singteh panin ih diik ding huih leh khuavotna hong pia huihte ih ngah hi. Hih singkung panin ih ngah tui le huih te pen anungta ganhing te aadingin athupi mahmah pumpi taksa nuntakna ihngah nading phungpi ahi hi. Tui omlohna leh huih omlohna ah nuntakna omlo hi. Singteh mahmah zong eite aading in anteh nektheih hongsuak hi. Singteh te hongkeu in hong pulh in lei a hoih sak leinel te hongsuak in singkung aliim bek zong eite aading tawldamna hongpia liim hong suak hi.

A sing mahmah zong eite aa dingin innlamna leh anhuan na, sabuai tutphah bawl nate cih bangin atuamtuam in ih zang lai hi. Guahtui leh leitang, tui leh singkung, tui le anunta mihing ganhing te' kizopna te alamdang takin ih muthei hi. Tua te pen Pasian in apilna tawh abawl a vangliatna ahi hi. A kipiangsak tui le leitang, leitang leh singkung tawh aki zomlo a nungta mihing ganhing omlo hi. Leitungah aki piang sak singkung lopa mual te, gun te, luitui te, tuipi te, vantung aa leng vasa te, leilak aa tai leilakah agamta ganhing te, leisungah ateng ganhing note, tuisungah anunta ngasa leh ganhing nam tuamtuam te, anam kibang het lo in abawl tua abawlsa te in akisap hun in anuntak nading un guah azu sak, singkung lopa te asel sak, nuntakna apia acing akem apiang sak Pa Pasian vangliatna ih muthei hi.

Ni le kha, aksi te in ahunhun in hong suakin zingsang hongtungin sun hongtung aa, zan cih te ahun hun in a om theih nading in avangliatna tawh abawl apiang sak pa in apilna tawh abawl ahi hi. Hih apian sak na khempeuh te tungtawn in ama pilna leh avangliatna te kimu thei in amah in ei mihing te nuntak nading akisam te hong sik den Topa hi-in ama bawlsa nate tungtawn in ama hong kep nate ih tel semsem nading in ama vangliatna te ih theih semsem nading in, ama bawlsa nate' a thupitna te ih theih semsem nading in, tuni lungdamna laisiangtho sungah khua mulo mittawpa in Topa Jesu tung athum mah bangin David tapa Topa Jesu aw, khua hong musak in ci-in thungen ciat ni. Amen.