Daily Reflection by Rev. Fr. Joseph Zo Mung (11.2.2020)

Mk.7:1-13 1. Tu-in Pharisee-te le lai siangtho siamte pawlkhat Jerusalem panin Jesu’ kimkoh ah hong kikaikhawm uh a, 2. a nungzuite kimkhat in khut sil loin an a nek uh a mu uh hi. 3. (bang hang hiam cih leh Pharisee-te le Jew mite khempeuh in pupate’ ngeinate a kipletna-un a ngeina bangin khut sil masa loin an ne lo uh hi. 4. Amaute sumbuk panin hong ciah uh ciangin zong kisil masa loin an ne lo uh hi. Tua ciangin haite, tuivot-beelte le niangbeelte sawpsiangna-a kipan tanglai ngeina adang tampite zong a tang uh hi.) 5. Tua ahih manin Pharisee-te le lai siangtho siamte in, “Bang hangin na nungzuite in pupate’ ngeina zui loin, khut nin tawh an ne ahi uh hiam?” ci-in a dong uh hi. 6. Jesu in amaute’ kiangah, “Isaiah in mi hoih a kineih khem note’ thu lai siangtho ah teltakin hih bangin na genkhol zo hi, ‘Hih mite in a muk uh tawh kei hong pahtawi uh a, ahi zongin a lungtang uh kei tawh kigamla hi. 7. A mawkna-in kei hong bia uh a, mihing’ bawltawm zuih ding thute upna zungpite bangin a hilh uh hi,’ ci-in kigelh hi. 8. Note in Pasian’ thupiakte nusia-in, mihingte’ bawltawm ngeinate na lencip uh hi,” a ci hi. 9. Tua khit ciangin Jesu in amaute’ kiangah, “Na tanglai ngeinate uh na tan theihna dingun Pasian’ thupiakte nial dan na siam uh hi! 10. Bang hang hiam cih leh, Moses in, ‘Na nu le na pa na zahtak in. A nu a pa a gensia mi peuhmah si taktak ding hi,’ a ci hi. 11. Ahi zongin note in, mi khatpeuh in a nu a pate khatpeuh kiangah, ‘Kei tung pana na ngah ding uh huhnate Corban (Pasian’ aadinga a ki-apsa van) hi ta hi,’ na ci uh a, 12. tua ciangin, ‘A nute a pate’ aading bangmah hihsak ding kisam nawn lo hi,’ na ci uh hi. 13. Tua bangin note na kipiaksawn uh na pupa’ ngeinate uh zangin Pasian’ thu bangmah lo na suaksak uh hi. Tua ciangin hih bangin na tampi na hih uh hi,” a ci hi.