Christian ih hih leh Christian bangin ih nuntak ding eite tavuan ahi hi.

Daily Homily by Rev. Fr. Thomas Tuang (July 6, 2021)

Tuni lungdamna Laisiangtho sungah Topa Jesu in apau theilo dawi lut khat hong damsak hi. A mute in Isarel gamah hi bangin na lamdang apiang kamu ngeikei uh hi ci-in lamdang sa mahmah uh hi. A pau theilo khat dawi in alei amat cip khat hong pau theih ciangin lamdang kisa hi. Topa Jesu in ama nasep pi ahih leh Pasian thu leh la taangko na, lungdamna thu hotkhiatna thu taangko na leh cina dam sak in dawi hawlkhiatna te anei ahi hi. Tua ahih leh tuni Pasian in hongtel Pasian nasem te in ih zawpsuak ding leh ih phawk dingin misiangtho Theresa of Avila kammal ih lungngai kik nuam hi. Misiangtho Avila in Topa Jesu in kamdang, mukdang, bildang, khedang, khutdang nei nawnlo hi. Ei aa tek hita hi ci hi. A cih nopna in Topa Jesu taang aa eite in itna thu agen ding, Pasian thu, hotkhiatna thu, lungdamna thu atangko ding in eite kam te ih zat ding cihna ahi hi. Topa Jesu in mihing bang aa hong om nawnlo aa ama thu tawh hong nuntak pih aa, tua thu te eiten ih pulak khiat ding kisam hi. Tua ahih manin ih nuntak sungin Topa Jesu nungzui hoih te, Topa Jesu nasem hoih citak te ih suah nadingin Topa hong piak thukham te ih zuih zawh den nading ih hanciam akul ding hi. Christian ih hih leh Christian bangin ih nuntak ding eite tavuan ahi hi. Bang hang hiam cih leh mite muh na ah Christian bangin ih om kei leh ih Christian nuntakna picing lo suak ding ahih manin eite Christian hihna agen tak ding, apicing dingin ih nuntakna tawh mite muh theih dingin ih lak zawh nading ih hanciam ding hi.