Catholic upna pen kiniamkhiatna nei-in, Pawlpi hong hilh thukhun te zui-in kipum khatna tawh nasepna ahi hi.

#Homily by Rev. Fr. Joseph Zo Mung (27.1.2020) 

Tuni Lungdamna Lai Siangtho (Mk 3:22-30) na tawh kizui in Topa Jesu ii dawi hawl khiatna thu, a Pa thu mangin kiniamkhiatna tawh a pa deihna bang zui a hih manin Dawi te in a ze-et zawhloh na thu, Nidang lai in Christian Upna leh Catholic Upna a ki bang hi mah ta leh tu hun Ciangin Christian veve Catholic Upna a nei lo mi om ta a hih manin Christian Upna leh Catholic Upna a ki lamdan na thu te hong gen hi. Catholic Upna ih cih pen Topa Jesu in Vantung aa om ka Pa deihna bang a sem dingin a hong pai hing ci-in a Pa deihna bang thu manna tawh a zuih mah bangin ei deihna bang zui lo in Catholic Siangtho Pawlpi hong hilh thu siangtho te Upna tawh zui-in thu maan thutak um in, kiniamkhiat na tawh Pawlpi hong hilh thu te nial lo in itna tawh a zui te pen Christian Upna suangah Catholic Upna a nei te a hi uh hi. Tua te in ki pum khat na tawh na sem in (Mt 16:18) suang aa Topa Jesu gen mah bangin Hell khua kongkhak Dawi gilo te in zolo a hih manin Leitung bup ah ki pumkhat in Khang sem sem hi.

Christian Upna nei teei na pin Catholic Upna a nei zo nai lo te pen a bang ci mite hiam cih leh Topa Jesu um in Topa Jesu nung pen a ma ii tha ngah dan dan in a zui te hi. Tua te in pen ki pumkhat ding thupi sa lo in a ma ii thangah bang bang in a tha ngah tan tan a zui ziau ziau te hi. Tua te in Makai, thu khun cih bangin a ki cian in nei lo in a tha ngah na te uh tawh ki zui-in a makai te zong laih ziau ziau, a thu khun te uh zong laih ziau thei uh hi. Tua te in ki pumkhatna diang thupi sa lo in Topa Jesu ii thu gen te a maute ciat ii teel bang bang, a tha ngah bang bangin a zuite a hi uh hi.
Tua bang mite in zong na hoih sem thei uh hi. Mi hehpih na zong nei thei uh hi. A hi zongin a tha ngah tan tan bek uh a sem te hi-in a maute in a tha ngah bang bang uh ki pawl na zong phuan ziau ziau thei uh hi. Gentehna in Gen vai, Dahna lam ah panpih na tawh na sem te zong hi thei pha diak hi. Tua kipawlna te in pen a om sa kipawlna sungah tha a ngah kei uh leh a mau deihna tawh ki tuak in kikhen khia in kipawlna thak phuan kik kik thei uh hi.

A hi zongin Catholic upna ah pen ki niamkhiatna nei-in ei deihna bulphuh lo in Pawlpi deihna Pawlpi ii hong hilh thu khun te zui-in ki pumkhatna tawh na sem uh hi. Thu kimanna tawh ki pumkhatna ding bulphuhin na ki sem a hih manin Pawlpi hong hilh thu siangtho te upna leh itna, thumanna tawh zui uh hi. Tua a hih manin Topa Jesu gen na tawh ki zui-in Pawlsuang aa om mite khat leh khat ki do lo in ki-itna, ki pumkhatna tawh na sem khawm a hih manun Dawite in zo lo in tua Pawlpi pen leitung bupah khang sem sem hi.
Ei thuzuite in Topa Jesu ii Pawlpi sungah ih om lam ki phawk pha pha in ih hamphatna te phawkin, ki-it kilemna leh ki pumkhatna tawh Catholic Siangtho Pawlpi hong hilh thu siangtho te lawptakin ih zuih ding hong hanthawn ing.