Catholic Nisim Lungdamna Laisiangtho. Paska Hun NipiKaal (5) Na. 7.5.2023(Sun)

John 14:1-12
1. Jesu in, “Note na lungkham kei un; Pasian um unla, kei zong hong um un.

2. Ka Pa’ inn sungah omna mun tampi a om hi. A om kei leh, note’ kiangah kong gen khin ding hi. Note’ omna ding mun bawlkhol dingin ka pai ding hi.

3. Pai-in note’ omna ding mun ka bawl khit ciangin ka omna munah note na om theihna dingun hong paikikin note kong pi ding hi.

4. Note in ka paina ding mun lampi na thei uh hi,” a ci hi.

5. Thomas in Jesu’ kiangah, “Topa aw, nang koi ah pai ding cih ka thei kei uh hi. Lampi bangci theih ding ka hi uh hiam?” a ci hi.

6. Jesu in ama kiangah, “Keimah in lampi ka hi a, thuman thutak le nuntakna zong ka hi hi, Kei hong suang loin Pa’ kiangah kuamah tung thei lo hi.

7. Note in kei nong theih uh leh, ka Pa zong na thei ding uh hi. Tu-a kipanin note in ka Pa na thei ta uh a, na mu khin uh hi,” a ci hi.

8. Philip in Jesu’ kiangah, “Topa aw, Pa hong lak lecin ka lung uh a kim ding hi,” a ci hi.

9. Jesu in ama kiangah, “Philip aw, keimah in note tawh om khawm khin napi-in kei hong thei nai lo na hi hiam? Kei hong mu mi in Pa zong a mu ahi hi. Bang hangin, ‘Kote, Pa hong lak in,’ ci thei na hi hiam?

10. Ahi zongin kei sungah om cih um lo na hi hiam? Note’ kianga kong gen thute keima utthu-a hong gen ka hi kei hi. Kei sunga om Pa in ama na a sem ahi hi.

11. Keimah in Pa sungah ka om a, Pa in kei sungah a omna thu na um un. Tua bang ahih kei leh zong na lamdang ka bawlnate’ hangin kei hong um un.

12. Ken a man takpi kong genin ah, kei hong um mi in ka sep ka bawlte sem ding uh a, amah in tuate’ sangin a lianzaw nangawn zong a sem ding hi. Bang hang hiam cih leh, Pa’ kiangah kei ka pai ta ding hi.

Hih in Topa' Lungdamna Lai Siangtho ahi hi.