Catholic Nisim Lungdamna Laisiangtho Mk 8: 34 - 9: 1 (Feb18.2022, Fri)

34. Jesu in a nungzuite le mihonpite ama kiangah sam a, “Mi khatpeuh in ka nung hong zuih nop leh amah le amah kinialin, a singlamteh pua-in ka nung hong zui ta hen.

35. Bang hang hiam cih leh, ama nuntakna a honkhia nuam peuhmah in a nuntakna a mang thangsak ding hi. Keima hang ahi zongin, Lungdamna Thu hang ahi zongin ama nuntakna a mangsak peuhmah in a nuntakna a honkhia ding hi.

36. Bang hang hiam cih leh mi khatpeuh in leitung buppi a neih hangin, a kha nuntakna mangthangsak leh, bang phattuamna om ding ahi hiam?

37. A kha nuntakna bang tawh khek thei ding ahi hiam?

38. Paktatin mawhna a bawl hih khang mite’ lakah, keimah le ka thu hangin maizumin kei hong pulak ngam lo mite, a Pa’ minthanna le a vantung mi siangthote tawh hong pai uh ciangin, Mihing’ Tapa in zong tua mite maizumsak ding hi,” a ci hi.

1. Tua ciangin Jesu in amaute’ kiang ah, “Ken a man takpi kong genin ah, hih lai-a ding mi pawlkhat in vangliatna tawh Pasian gam hong tung, a muh matengun sihna a ciam kei ding uh hi,” a ci hi.