Catholic Nisim Lungdamna Lai Siangtho. Lk 9: 28 - 36 (March 13.2022, Sun)

28. Tu-in Jesu in hih thu a gen zawh ni giat bang a phak ciangin, Peter, John le James-te samin, thu ngen dingin mual tungah a kahtohpih hi.

29. Jesu in thu a nget laitakin a meel kikhel a, a puan zong a paak lela hi.

30. Thakhatthu-in Moses le Elijah-te mi nih in Jesu a hopih amaute in a mu uh hi.

31. Amaute vangliatna le minthanna tawh hong kilang uh a, Jesu tawh kiho-in Jerusalem khuapi ah sihna a thuakna ding thu a gen uh hi.

32. Tu-in Peter le a pawlte a ihmut uh suak mahmah a, a lusu uh hi. Ahi zongin a khanlawh uh ciangin, Jesu’ vangliatna le amah tawh ading khawm mi nih a mu uh hi.

33. Tua mite Jesu kiang pan a paikhiat laitakun Peter in, “Topa, hih lai-a i om nuam mahmah hi. Nang’ aading buk khat, Moses’ aading buk khat, Elijah’ aading buk khat, buk thum kong lamsak ding uh hi,” ci-in ama gen bang hiam cih zong thei loin a gen hi.

34. Tua banga a pau laitakin meii khat in amaute tuam a, meii lakah a tum uh ciangin amaute a lau uh hi.

35. Tua khit ciangin meii lak pan aw khat hong ging a, “Hih pa in ka teelsa ka Tapa ahi hi. Ama thu na ngai un,” a ci hi.

36. Aw a gin’ khit ciangin Jesu amah bek a om a mu uh hi. Nungzuipite in amau muhsa thute tua hunin kuama kiangah gen lo uh hi.