Catholic Nisim Lai Siangtho simna Matthew 10: 37-42

Lungdamna Lai Siangtho; Matthew 10: 37-42, 37. “Kei’ sangin a pa ahih kei leh a nu a itzaw mi peuhmah, kei tawh kilawm kituak lo hi; kei’ sangin a tapa ahih kei leh a tanu a itzaw mi peuhmah kei tawh kilawm kituak lo hi; 38. a singlamteh pua a, ka nung hong zui lote in kei tawh kilawm kituak lo hi. 39. Amah le amah a nuntakna a kihu nuam mi peuhmah in a nuntakna mansuah dinga, keima hangin a nuntakna a mansuah mi peuhmah in nuntakna a mu ding hi. 40. “No hong sangte in kei hong sang hi-in, kei hong sangte in kei hong sawlpa a sang ahi hi. 41. Mi khatpeuh in kamsang khat pen kamsang’ min tawh a san leh, kamsang’ phattuamna ngah ding hi; mi khatpeuh in midik khat pen midik’min tawh a san leh midik’ phattuamna a ngah ding hi. 42. A mantakpi kong genin ah, hih mite’ lakah a neu pen khat peuhpeuh keima nungzui ahih manin tuivot hai khat a suah peuhmah in phattuamna ngah loin om lo ding hi.,” a ci hi.

Hih in Topa' Lungdamna Lai Siangtho ahi hi.