Catholic Nisim Lai Siangtho. Hun Nautaang Nipikaal (26) Na (SUN.) September 29.2019

Lungdamna Lai Siangtho.

(Lk. 16: 19-31)

19. “Khatvei lai-in mi haupa khat a om hi. Tua pa in manta meel puan le saihadial puan silhin nisimin noptatin an lim pente ne-in a om hi.

20. A kongpi gei-ah a pumtangin meima a vei Lazarus kici mizawng khat a lum hi.

21. Amah in mi haupa’ sabuai pana kia an nengte a duhgawh hi. Uite nangawn hong pai-in a meimate a liahsak uh hi.

22. Tua mizawngpa si-in, vantung mite in Abraham’ ang sungah a puak uh hi.

23. Mi haupa zong si-in a kivui hi. Hell gam meikuangpi sung ah gimna nakpi a thuak laitakin a khuadak leh a gal pekpekah Abraham le Abraham’ ang sunga om Lazarus a mu hi.

24. Tua ciangin amah in, ‘Pa Abraham aw, kei hong hehpih in. Hih meikuang sungah gimna nakpi-in thuak ka hih manin Lazarus in a khutme dawn tui ah diahin ka leii hong votsakna dingin ka kiangah hong sawl in,’ ci-in kiko-in a thum hi.

25. Ahi zongin Abraham in, ‘Ka tapa aw, nang na nuntak hun lai-in nopsakna na ngah khin zo a, Lazarus in ahih leh gentheih haksatnate a thuakna thu na phawk in. Tu-in ahih leh, amah in hehnepna a ngah kik hi. Nang na hih leh, nakpi-in gimna na thuak hi.

26.Tua tham loin nang le ko kikal ah guam thuk mahmah khat a om hi. Tua ahih manin hih santak panin nangma kiang ah a galkah nuamte in, hong galkah zo lo uh hi. Tua santak pan ko kiangah hong galkah nuamte in zong hong galkah zo kei uh hi,’ a ci hi.

27. Amah in, ‘Tua ahih leh pa aw, ka pa’ inn ah Lazarus nong sawlsak ding kong thum hi.

28. Bang hang hiam cih leh keimah in sanggam pasal nga ka nei hi. Tua ka sanggamte hih gim thuakna mun hong tun lohna dingun Lazarus in hong va hilhsakna dingin ka deih hi,’ a ci hi.

29. Ahi zongin Abraham in, ‘Amaute’ kiangah Moses le kamsangte a om uh hi.

30. Tuate’ thu ngai ta uh hen,’ a ci hi. Mi haupa in, ‘Hilo hi, pa Abraham aw, a sisate’ kiang panin amau’ kiangah khatpeuh va pai leh amaute kisikkik ding uh hi,’ a ci hi.

31. Abraham in ama kiangah, ‘Tuate in Moses’ thu le kamsangte’ thu a ngaih nop kei uh leh, a sisa khatpeuh a thawh kik hangin amaute in um zo tuan lo ding uh hi,’ ci-in a dawng hi,” a ci hi

Hih in Topa’ lungdamna Lai Siangtho ahi hi.