Catholic Nisim Lai Siangtho. Hun Nautaang Nipikaal (26) Na (SAT.) October 5.2019

Lungdamna Lai Siangtho.

(Lk. 10: 17-24)

17. Sawmsagih le nihte lungnuamin ciah kik uh a, “Topa aw, nangma min tawh dawite nangawn ka zo uh hi,” a ci uh hi.

18. Jesu in amaute’ kiangah, “Khuaphia bangin vantung pan Satan hong kiasuk ka mu zo hi.

19. En un, note in gul gilote le aikamte na tuatcil theihna ding uh le na galpa’ thahatna khempeuh na zawhna dingun thuneihna kong pia hi.

20. Tua ahih manin note bangmah in hong bawlsia zo lo ding hi. Ahi zongin dawi gilote in na thu uh hong manna hangin na lungdam kei unla, vantung ah na min uh a kigelhna hangin na lungdam zaw un,” a ci hi.

21. Tua laitakin Jesu in Kha Siangtho sungah lungdam a, “Vantung le leitung a uk ka Pa aw, nangmah in hih thute mipilte le misiamte’ tungah na ima, naupangte’ tungah pholak na hih manin nangmah kong phat hi. Hi mah hi, ka Pa aw, tua in nangma deihna ahi hi.

22. Ka Pa in na khempeuh kei hong ap zo hi. Pa longal kuamah in Tapa thei lo a, Tapa le Tapa mah in a theihsak dinga a teelte longal kuamah in Pa a thei kei hi,” a ci hi.

23. Tua ciangin a nungzuipite’ lamah amah kihei a, amaute’ kiangah, “Note in na muh uh nate a mu mitte in thupha ngah ahi hi.

24. Bang hang hiam cih leh, na muhteuh kamsang tampite le kumpi tampite in a muh nop uh hangin a mu kha kei uh hi. Note in na zakte uh a zak nop uh hangin za kha lo uh hi,” a ci hi.

Hih in Topa’ lungdamna Lai Siangtho ahi hi.