Catholic Nisim Lai Siangtho. Hun Nautaang Nipikaal (21) Na (MON.) August 26.2019

Lungdamna Lai Siangtho.
(Mt. 23: 13-22)

13. “Ahi zongin mi hoih a kineih khem no lai siangtho siamte le Pharisee-te aw, gimna na thuak ding uh hi! Bang hang hiam cih leh, mite’ mai-ah vantung gam kongkhak na khak uh hi. No lah lut loin, a lut nuamte lah na lutsak kei uh hi.*

14. Mi hoih a kineih khem no lai siangtho siamte le Pharisee-te aw, gimna na thuak ding uh hi! Bang hang hiam cih leh note in meigongte’ innte na netum uh a, mite in mi hoih hong sak theihna dingin thu saupipi na ngen uh hi. Tua ahih manin note in mawhsiatna lian zaw na ngah ding uh hi.

15. Mi hoih a kineih khem no lai siangtho siamte le Pharisee-te aw, gimna na thuak ding uh hi! Bang hang hiam cih leh note in mi khat na kikhelsakna dingun tuipi le lei-tung na kantan uh a, amah na ngah uh ciangin no zah nihin hell’ ta na suaksak uh hi.

16. “No mittaw lamhilhte aw, note in gimna na thuak ding uh hi! Bang hang hiam cih leh note in, ‘Mi khatpeuh mun siangtho tawh a kiciam leh phamawh lo hi. Ahi zongin mun siangtho sunga khamte tawh a kiciam leh ama kiciamna in amah a hen hi,’ na ci uh hi.

17. No mittaw mihaite aw! Tua khamte thupizaw ahi hiam? Ahih kei leh tua khamte a siangthosak mun siangtho thupizaw ahi hiam?

18. ‘Mi khatpeuh biakna tau tawh a kiciam hangin phamawh lo hi. Ahi zongin biakna tau tunga om nate kiciamna-a a zang peuhmah ama kiciamna in a hen hi,’ na ci uh hi.

19. Bangzah ta-in na mit uh taw hiam! Bang hang hiam cih leh biakna tau tunga nate le tua nate a siangthosak biakna tau koi thupizaw ahi hiam?

20. Tua ahih manin biakna tau tawh a kiciam peuhmah tua biakna tau le a tunga om nate khempeuh tawh a kiciam ahi hi.

21. Mun siangtho tawh a kiciam peuhmah tua mun siangtho le a sunga om pa tawh a kiciam ahi hi.

22. Vantung tawh a kiciam peuhmah Pasian’ tokhom le tua tunga tupa tawh a kiciam ahi hi.

Hih in Topa’ lungdamna Lai Siangtho ahi hi.