Catholic Nisim Lai Siangtho. Hun Nautaang Nipikaal (20) Na (THUR.) August 22.2019

Lungdamna Lai Siangtho.
(Mt. 22: 1-14)

1. Jesu(a) in mihonpite’ kiangah thugentehna zangin a gen kikin ah:

2. “Vantung gam in, a tapa’ aading mopawi a bawl kumpipa tawh kibang hi.

3. Amah in a sapkholhsate sam dingin a nasemte a sawl hangin a sapkholhsate a pai nuam kei uh hi.

4. Khatvei, a dang nasemte sawl a, ‘En un, kei ka pawi bawlna ding ka kiging khin zo hi. Ka bawngtalte le bawngno thaute kigo khin zo hi. Na khempeuh kiman khin ta hi. Mopawi hong siim ta un,’ ci-in ka sapkholhsate va hilh kik un, ci-in a sawl hi.

5. Ahi zongin a sapte in awlmawh lo uh a, amaute khat in lo kuansanin, adang khat in ama nasepna ah paisan hi.

6. A omlai teng in a nasemte manin, bawlsia uh a, a that uh hi.

7. Kumpipa in hih thu a zak ciangin, heh mahmah a, a galkapte kuansakin, tua mi thatte khempeuh thatin a khuapi uh a haltumsak hi.

8. Tua ciangin amah in a nasemte’ kiangah, ‘Mopawi a kigingsa-in a om hi. Ahi zongin ka sapsate pawi hong siim dingin kilawm lo uh hi.

9. Tua ahih manin lamzinpite ah va pai unla, na muh khempeuh uh mopawi ah hong sam un,’ a ci hi.

10. Nasemte lamzin tengah pai kawikawi uh a, misia mipha a muh khempeuh uh a kaikhawm uh hi; tua ahih manin mopawi innpi pawisimte tawh a kidim hi.

11. Ahi zongin kumpipa in pawisimte a en dingin hong lut ciangin mopawi puan a silh lo mi khat a mu hi.

12. Amah in tua pa’ kiangah, ‘Lawm aw, mopawi puan silh lopi-in hih lai-ah bangci lut theih na hi hiam?’ ci-in a dot ciangin tua pa in a dawnna ding thei lo hi.

13. Tua ciangin kumpipa in a nasemte’ kiangah, ‘Tua pa a khut a khe hen unla, kahna le ha-gawina a omna mun a pualam khuamialna sungah va lawnkhia un,’ a ci hi.

14. Bang hang hiam cih leh a kisam mi tam a, ahi zongin a kiteel mi a tawm hi,” a ci hi.

Hih in Topa’ lungdamna Lai Siangtho ahi hi.