Catholic Nisim lai Siangtho John 21: 15-19 Simna

Lungdamna Laisiangtho: John 21: 15-19, 15. Amaute in zing an a nek khit uh ciangin Jesu in Simon Peter’ kiang ah, “John’ tapa Simon aw, hih mite’ sangin kei nong itzaw hiam?” ci-in a dong hi. Peter in, “Kong itzaw hi, Topa aw, nang kong it lam na thei hi,” a ci hi. Jesu in, “Ka tuute na vak in,” ci-in thu a pia hi. 16. Jesu in Peter’ kiang ah, “John’ tapa Simon aw, kei nong it hiam?” ci-in a nihveina a dong hi. Peter in, “Kong it hi, Topa aw, nang kong it lam na thei hi,” ci-in a dawng hi. Jesu in, “Ka tuute na cing in,” a ci hi. 17. Jesu in ama kiangah, “John’ tapa Simon aw, kei nong it hiam?” ci-in a thumveina a dong hi. “Kei nong it hiam?” ci-a thumvei a dotna hangin Peter dah a, “Topa aw, nangmah in na khempeuh na thei a, nang kong it lam na thei hi,” a ci hi. Jesu in, “Ka tuute na vak in. 18. Ken a man takpi kong genin ah, na khangno lai-in na kawng gakin, na utna mun khempeuh ah na pai thei hi. Ahi zongin na teek ciangin na khut zanin midang khat in na kawng hong gaksak dinga, na ut lohna munah nang hong paipih ding hi,” a ci hi. 19. Tua thu a genna in, Peter in bangci bang sihna tawh Pasian minthangsak ding, cih Jesu in a genna ahi hi. Tua thu a gen khit ciangin Jesu in Peter’ kiangah, “Ka nung hong zui in,” a ci hi.

HIh in Topa' Lungdamna Lai Siangtho ahi hi.