Biakinn pualamah pai in eite itna akisam mite tungah itna ih lah zawh nading hanciam ni.

Daily Homily by Rev. Fr. Paul Lian (June 25, 2021)

-Tuni laisiangtho sungah eite phak natna bangin kih huai in ginalo thanem in ih om hangin Topa in eite hong it veve hi. Eite ih dam ding hong deih in amah tawh ih kipawl ding Topan hong deih tawntung hi cih thu tuni laisiangtho in eite hong thei sak nuam hi. Jew te ngeina sungah phak natna tawh kisai amaute in thukham na nei uh hi. Hih phak natna anei te in midang te tawh kiho ding, kipawl ding leh midang te omna mun ah amaute pai ding kiphal lo hi. Amaute kituam koih in amau tawh aki lawng kha, akisawh kha mite pen a siangtho lo hi ci-in kiciam teh ding hi. Tua ahih manin amaute ki lipkhap in kipawl pih dingin kua mah in a deihlo te ahi uh hi.

-"Topa aw, nong damsak nop leh nong damsak thei ding hi," cih kammal ih lungngaih ding in ih deih hi. Banghang hiam cih leh amah natna nei mipa ahih mah bangin tua natna aneih na pan in adam nuam ahihi. Natna pan in adam nuamlo kua mah omlo ding hi. Ahi zongin tuni ama nget in bang hiam? tua bangin phak natna nei hi mah tase leh Pasian deihna masak hi. "Topa aw, nang nong thukim pih leh, Topa aw nang na deih leh, Topa aw nang nong deihsak leh nong damsak thei ding hi. Nong dam sak kei leh zong nang ma thu hi. Bang bang apiang zongin nang deihna ahih nak leh ka thuak siam ding hi," ci-in amah in Pasian deihna amasak na thu tuni in eiten ih mu hi.

-Topa Pasian in mualtungah mualtung thuhilhna nam giat te na gen hi. A thukhum thak ahi itna thu hilh cian na te nagen hi. Topa Jesu in tua mualtungah om suak lo in Mihing te nuntaknate azang khia ding in tua mualtung pan in hong kumsuk ahihi cih tuni laisiangtho sungah ih mu hi. Tua ahih manin Topa in tua mualtungah thuhilh bek in om leh baih mahmah ding hi. Tua mah bangin eite zong ih nuntakna ah baikinn sungah thungen in om in thungetna te kipawlna te ah kihel in hile hang anuam mah ahi hi. Ahi zongin Topa Jesu in mualtung pan in hong kum suk in mual nuai aa om ama itna akiam te, ama damsakna akisam te, ama hehpihna akisam te kiangah hong zuan hi. Eite in zong tuni in biakinn sung bek ah hilo in, thungetna bek ah hilo in biakinn pualam ah pai in mualtung pan in mual nuai ah kumin eite itna akisam mite, acimawh mite, adamlo mite, mawhnei mite tungah eiten itna ih lah ding, eite itna alamen mitampi takin eite hong ngak hi cih phawk in Topa Jesu mah bangin mualtung pan in tuakin ih khut te zan in mite tungah damna, lungnopna apia ih hih kim ciat zawh nading in hanciam ni.