Atho kik Topa vangliatna leh gualzawhna in atawpna ah eite hong gualzawh pih ding hi

Jesu in kei hong honpa hi ci-in ih san theih ciangin ih nuntakna ah bang hong piang ding hiam cih leh sihna leh thawhkikna a umte ih suak ding hi. Ih nuntakna sungah siatna te piang thei hi cih ih um ding hi. Nuntakna ah lungkiatna, lungzinnate hong piang thei hi cih ih um ding hi. Mite pampaihna, nuaisiatna te ih thuak ding hi. Haksatna, ze-et na te in hong ngak gige hi. Singlamteh pen Jesu nung zuihna ah ih puak pelmawh ding hi cih ih thei hi. Hi te in Topa Jesu pen ka honpa hi ci-in ih san tak ciangin ih puakding, ih phulkhak ding singlamteh hi.

Ahi zongin Jesu in Mesiah ah ci-in um ih manin tua singlamteh te khempeuh eite in ih kantan zo ding hi. Ih galte ih zo dinga, amaute in eite hong nuihsan ngamlo ding hi. Asia na te, sihna te nangawnin eite Jesu tawh hong khen zo lo ding hi. Atho kik Topa vangliatna leh gualzawhna in atawpna ah eite hong gualzawh pih ding hi cih eite in ih um hi. Ih Pasian in a gualzo Topa hi.

Tua ahih manin ih nisim nuntakna ah Misiangtho Peter bangin nang mah in Pasian Christu na hi hi, ka lamet na na hi hi, kei hong honpa na hi hi, ka Topa na hi hi, na nung kongzui tawntung ding hi aci thuzui khat ciat ih hih zawh na dingin Pasian eite thupha hong pia ta hen.