Catholic Nisim Lai Siangtho, Hun Nautaang Nipi (22) Na, September 1, 2020

Lungdamna Lai Siangtho (Luke 4: 31-37)

31. Galilee gam Capernaum khua ah Jesu paisuk a, Sabbath ni-in amaute thu a hilh hi. 32. Amaute in ama thuhilhna lamdang a sa uh hi. Bang hang hiam cih leh, amah in thuneihna tawh thu a hilh hi. 33. Kikhopna inn sungah kha nin a lut mi khat om a, amah in, 34. “Nazareth mi Jesu aw, kote bang hong cih nuam na hi hiam? Kote susia dingin hong pai na hi hiam? Nang kua na hi hiam, cih kong thei hi. Pasian’ mi siangtho na hi hi!” ci-in a aw neihzah tawh a kiko hi. 35. Ahi zongin Jesu in, “Pau kei inla, ama sung pan paikhia in,” ci-in khauhtakin amah a taai hi. Dawi in amaute khempeuh mai-ah amah a puksak khit ciangin amah liamsak loin a paikhia hi. 36. Mi khempeuh in lamdangsa uh a, “Hih thuhilhna bang ahi hiam? Bang hang hiam cih leh thuneihna le vangliatna tawh kha ninte thu a piak ciangin a paikhia uh hi!” ci-in khat le khat a kikum uh hi. 37. Ama thu tua gam mun khempeuh ah a kizeel hi.

Hih in Topa' Lungdamna Lai Siangtho ahi hi.