“Vantung gam in lo lai-a kiseel na manpha tawh kibang hi"

Catholic Nisim lai Siangtho, Hun Nautaang Nipi (17) Na

Mi Siangtho Joachim leh Anna Pawi Ni (Nu leh Pa Pawi) July 26, 2020

Lungdamna Lai Siangtho (Matthew 13: 44-52)

44. “Vantung gam in lo lai-a kiseel na manpha tawh kibang hi. Mi khat in tua na manpha a muh ciangin a seel kik hi; tua ciangin lungdamna tawh ciah a, a neihsa khempeuh zuakin, tua lo a lei hi. 45. “Khat leuleu ah, vantung gam in a hoih mahmah kep manpha a zong sumbawlpa tawh kibang hi. 46. Sumbawlpa in a mantam mahmah kep manpha khat a muh ciangin ciah pah a, a neih khempeuh a zuak khit ciangin tua kep manpha a lei hi. 47. “Khat kik ah, vantung gam in tuipi sungah khuhsukin ngasa namkim a kimat theihna ngeen tawh kibang hi. 48. Ngasa tampi a awk ciangin, ngabengte in tui gei-ah a ngeen uh kaikhia-in tusuk kawmin ngasa a limci teng teelin a ngabawm sung uh ah koih uh a, a hoih lo teng a paikhia uh hi. 49. Leitung hun a bei ciangin, tua bang mahin ahi ding hi. Vantung mite hong kumsukin midikte’ lak pan migilote khenkhia-in, 50. meiphualpi sungah khia ding uh a, tua lai-ah kahna le hagawina a om ding hi,” a ci hi. 51. Jesu in amaute’ kiangah, “Hih thu khempeuh na telcian khin uh hiam?” ci-in a dong hi. Amaute in, “Ka tel mah uh hi,” ci-in a dawng uh hi. 52.Tua ciangin amah in amaute’ kiangah, “Tua hi a, vantung gam thute sin a, a thei khin lai siangtho siamte khempeuh in amaute’ na manpha kholna sung pan a lui, a thak cih om loin a ututin a lakhia thei ziauziau inn neipa tawh kibang uh hi,” a ci hi.

Hih in Topa' Lungdamna Lai Siangtho ahi hi.