“Tho in, naungek le a nu la inla, Egypt ah taipih in"

Catholic Nisim Lai Siangtho, Innkuan Siangthote' Pawini, Dec 28, 2020 (MON)

Lungdamna Lai Siangtho (Matthew 2: 13-18)

13. Tu-in amaute a ciah khit phetun Topa’ vantung mi khat Joseph’ mang sungah hong kilang a, “Tho in, naungek le a nu la inla, Egypt ah taipih in, thu ka hong hilh kik matengin tua lai-ah va om un; bang hang hiam cih leh Herod in naungek thah dingin a zong ding hita hi,” a ci hi. 14. Tua ciangin Joseph tho a, tua zan mahin naungek le a nu la-in, Egypt ah taipih a, 15. Herod a sih matengin tua lai-ah a om uh hi. Hih in, “Egypt panin ka tapa ka samkhia hi,” ci-a Topa in kamsangpa’ tungtawn a a genthu a tangtunna ahi hi. 16. Herod in mipilte’ khem lam a theih ciangin heh mahmah a, mipilte’ tung panin aksi a kilat hun tawh kizui-in, Bethlehem khua sung le a kim a om khuate-a naupangno kum nih le a nuaisiah khempeuh a thatsak hi. 17. Tua ciangin kamsangpa Jeremiah’ tungtawn a: 18. “Ramah ah nakpitaka kahna le tamlawhna awging kiza hi. Rachel in a tate kahkah a, a tate khat zong om nawnlo ahih manin kihehnem zo lo hi,” ci-a a genkholhna thu a tangtunna ahi hi.

Hih in Topa’ Lungdamna Laisiangtho ahi hi.