“Tho in, na lupna pua inla, na inn ah ciah in, kong ci hi,”

Catholic NIsim Lai Siangtho , Hun Nautaang Nipi Kaal (1) Na, (FRI). January 17. 2020, Lungdamna Lai Siangtho (Mark 2: 1-12)

1. Ni tawmno khit ciangin Capernaum khua ah Jesu pai kik a, inn ah om hi, cih thu mite in a za uh hi.

2. Kongvang pualam nangawn ah omna ding om lo zah dongin mi tampi hong kikhawm uh a, Jesu in amaute’ kiangah thu a hilh hi.

3. Tua laitakin mi li in khut le khe zaw mi khat hong zawng uh a, ama kiangah a paipih uh hi.

4. Mihonpite om ahih manin tua mite in Jesu kiangah a paipih zo kei uh hi. Tua ahih manin Jesu omna tungsan innkhum a honkhiat khit uh ciangin a lupna tawh cinapa a khaisuk uh hi.

5. Jesu in amaute’ upna a muh ciangin a khut le a khe zawpa’ kiangah, “Ka ta aw, na mawhnate kimaisak zo hi,” a ci hi.

6. Tua lai-a tu lai siangtho siamte pawlkhat in,”

7. Bang hangin hih pa in tua bangin pau ahi hiam? Pasian tung ah a pau khial hi. Pasian longal kua in mawhna maisak thei ahi hiam?”ci-in a ngaihsun uh hi.

8. Amaute’ lungsim sunga a ngaihsutna uh Jesu in a kha-in theipah ahih manin amaute’ kiangah, “Note in bang hangin na lungsim sung uh ah hih thute ngaihsun na hi uh hiam?

9. Khut le khe zawpa’ kiangah bang ci-leng baihzaw hiam? ‘Na mawhna kimaisak zo hi,’ ci-leng baihzaw ahi hiam? Tua ahih kei leh, ‘Tho inla, na lupna pua-in pai in,’ ci-leng baihzaw hiam?

10. Ahi zongin Mihing’ Tapa in hih leitung ah mawh maisak theihna ding thu nei hi, cih na theihna dingun, amah in khut le khe zawpa’ kiangah

11. “Tho in, na lupna pua inla, na inn ah ciah in, kong ci hi,” a ci hi.

12. Amah tho to-in thakhatin a lupna la a, amaute khempeuh muhin a paikhia hi. Mi khempeuh in lamdang sa uh a, “Hih tawh kibang i mu ngei nai kei hi,” ci-in Pasian a phat uh hi.

Hih in Topa' lungdamna Lai Siangtho ahi hi.