"“Satan!(a) taikhia in, bang hang hiam cih leh, Lai Siangtho sungah, ‘Topa na Pasian bia inla, ama na bek sem in,’ ci-in kigelh hi"

Catholic Nisim Lai Siangtho, Zetan Hun Sungah Nipi Masa, (SUN). March 1, 2020

Lungdamna Lai Siangtho (Matthew 4: 1-11)

1. Tua khit ciangin dawimangpa’ ze-etna a thuak dingin Kha Siangtho in sehnel gamlak ah Jesu a paipih hi.

2. Amah in sun sawmli le zan sawmli an a tan’ khit ciangin a gilkial hi.

3. Ze-etpa a kiangah hong pai a, “Nangmah in Pasian’ Tapa na hih leh hih suangtumte an suaksak in,” a ci hi.

4. Ahi zongin amah in, “Lai Siangtho sungah: ‘An bek tawh mihingte a nungta hi lo a, Pasian’ kam pana hong pusuak thu khempeuh tawh a nungta ahi hi,’ ci-in kigelh hi” a ci hi.

5. Tua ciangin dawimangpa in khuapi siangtho ah Jesu paipih a, Biakinnpi khum zangah koihin,

6. ama kiangah,“Nangmah in Pasian’ tapa na hih leh, nang le nang kikiasuksak in, bang hang hiam cih leh Lai Siangtho sungah: ‘Amah in nang aadingin ama vantung mite thupia dinga na khete le suangtumte a kitah khak lohna dingin a khut uh tawh hong domto ding uh hi,’ ci-in kigelh hi,” a ci hi.

7. Jesu in ama kiangah, “Topa na Pasian na ze-et kei in,’ ci-in Lai Siangtho ah kigelh hi,” ci-in a dawng hi.

8. Tua khit ciangin dawimangpa in mual sang mahmah khat tungah amah kahtohpih a, leitung kumpi gam khempeuh le a vangliatna uh a lak hi.

9. Tua ciangin amah in Jesu kiangah, “Ka mai-ah kunin hong bia lecin hihte khempeuh nang kong pia ding hi,” a ci hi.

10. Jesu in ama kiangah, “Satan!(a) taikhia in, bang hang hiam cih leh, Lai Siangtho sungah, ‘Topa na Pasian bia inla, ama na bek sem in,’ ci-in kigelh hi, a ci hi.

11. Tua ciangin dawimangpa ama kiang pan paikhia a, thakhatthu-in vantung mite hong pai-in, ama kisapnate a sem uh hi.

Hih in Topa' lungdamna Lai Siangtho ahi hi.