“Note’ tungah vantung gam thuthukte theih theihna ding hong kipia hi"

Catholic Nisim lai Siangtho, Hun Nautaang Nipi (15) Na, July 12, 2020

Lungdamna Lai Siangtho (Matthew 13: 1-23)

1. Tua ni mahin tua inn panin Jesu paikhia a, tuipi gei-ah a tu hi. 2. Ama kiangah mi tampi hong kikaikhawm uh ahih manin amah pai-in gunkuang tungah a va tu hi. Mihonpite piauzang ah a ding uh hi. 3. Amah in amaute thugentehna tuamtuam tawh thu tampi hilhin a genin ah: “Ngai un! Khaici vawhpa khat in khaici vawh dingin a kuankhia hi. 4. Khaici a vawh ciangin pawlkhatte lamdungah kia a, vasate hong leengin, a ne uh hi.5. Pawlkhatte suangtamna leilak ah a kia hi. Leisah loin lum ahih manin khaici a po pah hi. 6. Ahi zongin zungthuk kha zolo uh ahih manin ni a sat ciangin ankungte vulin a keu hi. 7. Pawlkhatte linglak ah kia a, a po uh hangin lingkungte in ankungte a depgawp uh hi. 8. Pawlkhatte lei hoihna munah kia-in hong khang a, pawlkhatte a zah za khat, pawlkhatte a zah sawmguk, pawlkhatte a zah sawmthum a gah uh hi. 9. Zakna ding bil a nei peuhmah in za ta hen!” a ci hi. 10. Tua khit ciangin a nungzuite ama kiangah va pai uh a, “Bang hangin thugentehna zangin amaute thuhilh na hi hiam?” ci-in a dong uh hi. 11. Amah in amaute’ kiangah, “Note’ tungah vantung gam thuthukte theih theihna ding hong kipia hi; ahi zongin amaute’ tungah kipia lo hi. 12. Bang hang hiam cih leh a neite kipiak beh dinga, a hau ding uh hi. A neilote’ tung panin a neihsate nangawn kilaksak ding hi. 13. Amaute in en napi-in mu lo uh a, ngai napi-in za loin, zong tel theilo uh ahih manin amaute’ tungah gentehna zangin thu a gen ka hi hi. 14. Kamsangpa Isaiah’ genkholhna amaute’ tungah a tangtung taktak ahi hi. Tua a genna ah: ‘Note in ngai ngai napi-in, na tel thei ngei kei ding uh hi! En en napi-in, na mutel thei kei ding uh hi! 15. Bang hang hiam cih leh, hih mite’ mit in khua mu-in, a bil in khua za a, a lungsim uh in theitelin keima lamah hong kihei le-uh, keimah in amaute’ natna pel loin damsak kha ding ka hih manin, amaute a lungsim uh kicing loin, a bilte uh ngong a, a mitte uh a si uh ahi hi,” a ci hi. 16. Ahi zongin note’ mit in khua mu-in, na bil un khua za ahih manin thupha a ngah na hi uh hi! 17. A man takpi kong genin ah, kamsang tampite le midikte in note’ muhte a muhnop uh hangin mu lo uh a, note’ zakte a zaknop uh hangin za lo uh hi. 18. “Tua ahih manin khaici vawhpa tawh thugentehna in bang hong hilhcian nuam ahi hiam, cih na ngai un. 19. Mi pawlkhat in vantung gam thu za napi-in telcian lo uh ahih manin dawi gilo khat hong pai-in a lungsim sunga kivawhsa thu a lakkhiatsak hi. Hih bangte pen lamdunga kia khaicite ahi uh hi. 20. Suangtamna leilak a kia khaicite pen Pasian’ thu za-in, lungdamna tawh a sang pahte ahi uh hi. 21. Ahi zongin tua bang mite in zungthuk kha lo uh ahih manin tawmvei sung bek a um mite hi uh a, Pasian’ thu hangin haksatna le bawlsiatna a thuak uh ciangin a tawpkik pah mite ahi uh hi. 22. Ling laka kia khaicite ahih leh, Pasian’ thu za napi-in leitung lunghihmawhna le hauh nopna hanga huaihamnate in depgawp ahih manin gah a gah zo lote ahi uh hi. 23. Ahi zongin lei hoihna ah a kia khaicite ahih leh Pasian’ thu za-in tel thei pah a, gah a gah mite ahih manun, pawlkhatte a zah za khat, pawlkhatte a zah sawmguk, pawlkhatte a zah sawmthumin a gahte ahi uh hi,” a ci hi.

Hih in Topa' Lungdamna Lai Siangtho ahi hi.