“Israel mite’ Topa Pasian in a mite angvanin a tankhia zo hi"

Catholic Nisim Lai Siangtho, Adventu Hun Nipi Kaal (4) Na, Dec 24, 2020 (THURS)

Lungdamna Lai Siangtho (Luke 1: 67-79)

67. Tua khit ciangin a pa Zechariah Kha Siangtho tawh kidim a, kamsangin a genin ah: 68. “Israel mite’ Topa Pasian in thupha ngah ta hen, bang hang hiam cih leh amah in a mite angvanin a tankhia zo hi. 69. Ama sila David’ innkuan sung pan eite’ aadingin hotkhiatna kii(a) khat hong potosak hi. 70. Tanglai ama kamsang siangthote’ kam panin a gensa mah bangin, 71. eite zong i galte le ei hong mudahte’ khut sung panin hong honkhia ding hi. 72. I pu i pate’ tunga a ciamsa hehpihna a lak ding le ama thuciamna siangtho phawk gigena dingin hih bangin ahih hi. 73. I pu i pa Abraham tunga a ciamsa tawh kizui-in, 74. i galte’ khut sung panin hong kihotkhiat ciangin, lau lo-a ama na a sem thei ding, 75. i nuntak sung teng ama mai-ah siangthona le dikna tawh ama na i sepna ding ahi hi. 76. Tua ciangin nang, ka tano aw, nang pen Sang Penpa’ kamsangpa hong kici ding hi; bang hang hiam cih leh ama lampi a sial ding le, 77. a minamte’ mawhnate maisakna tawh hotkhiatna thu theihna a pia dingin Topa’ mai-ah na pai ding hi. 78. Eite’ Pasian hehpihna lianpi hangin van pan khuavak i tungah hong tang dinga, 79. khuamial sung le sihna liim sunga a tu mite’ tungah hong tangin, nopsakna lampi ah hong kha ding hi,” a ci hi.

Hih in Topa’ Lungdamna Laisiangtho ahi hi.