“Hih na zak uh Lai Siangtho thu tuni-in hong tangtung zo hi,”

Catholic Nisim Lai Siangtho, Lungdambawl Hun, Jan 7, 2021 (THU)

Lungdamna Lai Siangtho (Luke 4: 14-22)

14. Tua khit ciangin Jesu, Kha Siangtho’ vangliatna tawh kidimin Galilee gamah a ciah kik hi. Ama thu tua gam khempeuh ah kizelin a thang hi. 15. Amaute’ kikhopna innte ah thu hilh a, mi khempeuh in amah a phat uh hi. 16. A khan khiatna khua Nazareth ah amah pai a, ama ngeina bangin Sabbath ni-in kikhopna inn ah lut a, Lai Siangtho sim dingin a ding hi. 17. Kamsangpa Isaiah’ laizial amah kipia hi. Amah in tua laizial zalin: 18. “Topa’ Kha Siangtho in ka tungah a om hi. Bang hang hiam cih leh, mizawngte’ kiangah Lungdamna thu a tangko dingin amah in kei sathau hong nilh zo hi. A kiman a kikhum mite’ kiangah suahtakna a tangko dingin ahi zongin, mittawte in khua a muhkik theihna ding uh ahi zongin, nenniamna a thuak mite khahkhiatna ding ahi zongin, 19. Topa’ hehpihna kum a tangko dingin ahi zongin, kei hong kisawl zo hi,” ci-in a kigelhna mun mu-in a sim hi. 20. A sim khit ciangin laizial zial kik a, kikhopna inn nasempa pia-in a tu hi. Kikhopna inn sunga om mi khempeuh in amah limtakin a en uh hi. 21. Tua ciangin amah in, “Hih na zak uh Lai Siangtho thu tuni-in hong tangtung zo hi,” a ci hi. 22. Mi khempeuh in amah phat uh a, ama kam pan hong pusuak thu manphate lamdang a sa mahmah uh hi. Amaute in, “Hih pa, Joseph’ tapa hilo ahi hiam?” a ci uh hi.

Hih in Topa’ Lungdamna Laisiangtho ahi hi.