“Eite in tuni-in na lamdangte i mu zo hi,”

Catholic Nisim Lai Siangtho, Adventu Hun Nipi Kaal (2) Na, Dec 7, 2020 (MON)

Lungdamna Lai Siangtho (Luke 5: 17-26)

17. Ni khat Jesu in thu a hilh laitakin, Jerusalem khuapi, Galilee gam le Judea gam khua khempeuh pana hong pai Pharisee-te le thukham hilhsiate amah tawh a kinaina munah a tu uh hi. Cinate a damsakna ding Topa’ vangliatna Jesu tawh a om hi. 18. Tua khit phetin mi pawlkhat in khut le khe zaw mi khat a lupna tawh hong pua uh a, inn sungah paipihin, Jesu’ mai-ah koih ding a hanciam uh hi. 19. Ahi zongin mihonpite’ hangin Jesu’ kiang a tut theihna ding uh lampi a muh theih loh uh ciangin inn khum ah kahtohpih uh a, a delhphah tawh cinapa Jesu’ mai mite lakah a khiasuk uh hi. 20. Jesu in amaute’ upna a muh ciangin, “Lawm aw, na mawhnate kimaisak zo hi,” a ci hi. 21. Tua khit ciangin Pharisee-te le lai siangtho siamte in, “Pasian’ le a siangtho nate a gensia hih pa kua ahi hiam? Pasian longal kua in mawhna maisak thei ahi hiam?” ci-in a ngaihsun uh hi. 22. Jesu in amaute’ ngaihsutna a theih ciangin, “Note in bang hangin na lungsim sung uh ah hih thute ngaihsun na hi uh hiam? 23. ‘Na mawhnate kimaisak zo hi,’ cih ding le ‘Tho inla pai in,’ cih ding koi baihzaw ahi hiam? 24. Ahi zongin Mihing’ Tapa in leitungah mawhna maisak theihna ding thu nei hi, cih a theihna dingun,” - Jesu in khut le khe zawpa’ kiangah - “Tho in, na lupna pua inla, na inn ah ciah in,” a ci hi. 25. Amah in amaute’ mai-ah thakhatthu-in tho a, a lupna pua-in Pasian’ min phatin a ciah hi. 26. Mi khempeuh in lamdang sa mahmah uh a, Pasian phatin, launa lungsim tawh, “Eite in tuni-in na lamdangte i mu zo hi,” a ci uh hi.

Hih in Topa' Lungdamna Lai Siangtho ahi hi.