Tualzang Khua St. Peter Biakinn Hon Pawi (18.4.2023)

Rev. Fr. Wilfred Do Suan vaihawm siamna tawh Lailui Parish huamsunga om Tualzang Khua St. Peter Biakinn pi pen Kalay Diocese hongcing hongkem Bishop Felix Lian Khen Thang in April 18, 2023 ni-in thupha pia in Biakinn hon pawi nasia takin kibawl hi.

St. Peter Biakinnpi pen adung pi (36), avai pi (88) pha-in hoih mahmah hi. Tualzang khua-ah inn (102) a om na sung pan RCM thuzui mi inn (43) pha in amau khua tawh kituakin Biakinn a golna zong hoih phet mahmah hi.

Hih Pawi pen Biakinn Hon Pawi, Jubilee Pawi leh Christmas Hanthotna piakna pawi tawh kigawm in Pawi nam (3) a ki bawlkhawm ahi hi.

Hih Biakinn honpawi ah Siadawpa, Siampite leh Deacon tawh akigawm (18) pha ahih manin Tualzang khua Pawlpi makaipa in "ka suahzawh ei Khamtung gama om Biakinn honpawi te ah Siampite tam ka muh pen na Pawi hi" ci-in Siampite leh Nungak Siangtho te tampi a pai manin alungdam phatdiakna thu pulaak khia hi. Missa Biakpiakna sungah thuzui mite (700) kim pha dingin ki lamen hi.

Tualzang khua pen a khuazangin ki thutuak mahmah in Zindawnna suangah zong Laipian Pawlpi te in Zola hoih mahmah khat asak kawmin hong lam ziahziah uh ahih manin tha kingah mahmah hi. Lenkhopna pen zintunni (17 pan 18) ni dong nitak nih sung noptakin ki bawl ziahziah hi. Biakinn huang pen neu pian ahih manin Pawi sung Biakinn huang sung teng mi akidim cih ding hi.

Pawi sungah Sial 4, Bawng 1 leh Vok 5 kigo in nekleh dawn kicing mahmah hi. Tui hamsat laitak himah taleh inntekte limtakin kiging khol uh ahih manun tui zat ding zong ki cing mahmah lel hi.

Zin tun nitak inntek lam pan thu zaksakna ah Pawi sung tui hamsa ahih manin tui pen na ciilzat un ci-in tangko himah ta leh a nitak nihna ciang Khangnote sung pan tui aval lua in a zang khialkha, khat leh nih zong om tuak lai veve hi.

Tu kum sung ih Diocese sungah Biakinn thak hon pawi pen Phai, Kanan, Singpial, Tuidil, Phaitu leh Tualzang cih bangin Biakinn thak (6) tak ki hong in tua Biakinn te pen a hoih leh a to dingin a kilam hi-in hoih thei mahmah uh hi.

Biakinn nei pa Topa Pasian zong lungkim mahmah ding ahih manin a pia khia thuzui mite in zong thupha ngah pha mahmah dingin ka lamen hi.

Hun siat kawmkal pan ih Biakinn lamna te leh Biakinn hon Pawi te picing takin ahong gualzawh pih ih Biak Topa Pasian tungah nakpi takin ih lungdam hi.

Ih Biak Pa Pasian in ih nasepna te hong tangtun pih a hih manin lungdam ih koh kawmin mailam hun te ah zong na hoih sepna leh thupha bawlna te ah kidem bawlin lawpna takpi tawh ih sepzawh ciat nang ih Biak Topa Pasian in ei mimal khat kim ciat tungah thupha hongpia ta hen! Amen.
By Fr. Joseph Zo Mung