INNKUAN NUNTAK ZIA LEH SUTPI THU By Rev. Fr. John Mang

Innkuan sungah a om loh a phamawh ih ngeina ahi i Pu i Pa te-in Inn a lam uh ciangin SUTPI ahi innkhuam leh Innkuan Nuntakzia ding cih thu kikum dih ni. Ih pu ih pa ten innlai zangah Sutpi a phut uh pen Innkhuam lakpanin a golzaw, a et lawmzaw, a zemna tuamtuamte tawh SUTPI na dingsak uh hi.

Banghangin Innlai zangah a po khat amin SUTPI ki ci hiam? Innkuan sungah kitel khelhna zong om thei, nupa kikaal ah zong lei leh ha zong kipet, sanggam u leh nau lakah zong kikam tamna om thei, teek leh mo kikal ah zong khat veivei kitel khelh nazong omthei, teekten’ zong mote hawmthawh lua-thei, a hih kei leh moten zong teekte’ khutzekna ki ngah lothei, tanu tapa kipat tahna te ah zong nu le pa te leh khangthakte ii muhna kibang lothei, ih ngaih sutna ki banglo, khangthankte deihna leh khangluite deihna kibanglo ahih manin khat veivei kitel khelhna om hi.

Tua te kawmkalah ih pu ih pa ten behsung ahi zongin, sanggam u leh nau sung ahi zongin, khua leh tuui sungah ahi zongin tua ki telkhelhna ki thu min lohna khat peuhpeuh a om ciang’ innkuan sungah ih pom ding, ih letding SUTPI na phut uh hi. Tua SUTPI in nang leh kei innkuan mite bek tham lohin, lengnaa na nei phial zongin, gaal nanei phial zongin tua SUTPI innah mawh kimai sak nadingin ih pu ih pa ten SUTPI nap hut uh hi. Misiangtho Paul in zite ahi zong pasakte a hi zongin kithuhual ki pumkhat in nuntak ding hong deihsak hi. Pasal ten zong zite it dingin mapang khawn ding hong deihsak hi. Ih pu ih pa ten innlai zang aa a phuh uh SUTPI a hangin tulai tak aa nang leh kei-in ih Biak Mihingte hongtan khia Pa Topa Jesu naphawk nailo uh hi.

Ih pu ih pa ten uite akte bawngte sialte tawh a mau theih zah ciangciangun dawite a na bia uh ahi hi. Tua dawite pen sisan luanna tawh ganhingte tawh dawite a lungkim sakin a bia ihpu ihpa tualniam lua ih sakten nah innsungah tua SUTPI naphut sese uh hi. Tua in-nah innkuan sung khat leh khat a mawhlo omlo, kitel khelhna om thei ahih manin tua mawh maina hongki piakna dingin SUTPI mawh kisutna, mawh kimai sakna dingin tua SUTPI naphut uh hi.

A zenzen in gentehna-in na innsungah na omlai takin, nazi na tate tawh innsungah na om lai takin nang na innkuan pihte hong bawlsia nuam khat hongpai henla hiam tawi-in na innsuangah hong lut hen la nangtawh kilai ki tawngin nang innteek pa in zo in ki liam suah in na om lai tak in na galpa in a zum a hiamte khia in na SUTPI a pom leh innteek na hih hang, nagal a hih hang, nang hong that dingpa ahih hang, na tanu tapa te a bawl sia ding aa hongpai ahih hang tua sutpi a pom na galpa pen thah khuan om lo hi. SUTPI pom in khial ing ei, mawh ing ei, gual lel ta ingei ci-in SUTPI a pom mikhat na thah teitei leh galman ki cilo-in tual that kici hi.

Tual giam ihsak, bangmah theilo ihsak, bangmah mulo ihsak, ih neu et phialphial ahi ihpu ihpa ten dawibiak bek tawh a na om lai vua ih ngeina sungah, ih minam sungah, ih behsungah, ih innkuan sungah ana phuh uh tua singkung in na galpa nagawn tawh kilemna bawl theih nadingin tua SUTPI a nap hut uh ahi hi. Tua ahih manin innkuan sung nuntak na ah tua SUTPI ih po sak lai hiam? Tua SUTPI ih pom ngei kha hiam? Tua SUTPI pom in Innkuan sung thu ki kupna ih nei ngei kha hiam? Tua SUTPI zong ih lungsim in ih gel ngeikha hiam? Pasian in minam khatin hong sap na-ah tua minam khat peuhpeuh ii ngeina hoihte pen Pasian in thupha hongpia hi. A maimang phiatmang ding cihna zong hilo hi. Christian ih suah zawh cingin tua ngeina te Laisiangtho kaammal tawh siangtho sakin ih nuntak pih ding ih zop pai suak dingin Pasian in hong dei hi.

Innkuan sungah khat leh khat thu hong kum khawm sak, ma hong pang khawm sak, inn leh lo lunggulhna hong neisak, nu leh pa teenna, ih laam kiatna, khua leh tui hong itsak, ih inn sungah itna a omna SUTPI ii a deihna mun Innpi ahi hi. Tua ahih man in ih Christian nuntak na-ah ih pu ih pa te’ dawibia te hi, nang leh kei Pasian a Bia te hi Christiante ih kici hi. Christian nuntak na tawh tua SUTPI pom in na zi, na pasal, na mo, na teeknu, na teekpa veng leh paamte tungah mawhna na maisak zo hiam? Ih nuntakna sungah SUTPI ih pom kul hi.

Pasian in Eden huan sungah Adam leh Eva ana koih lai-in huan laizangah nuntakna singkung na posak hi. Tua nuntakna singkung tuni-in nang leh kei innkuan sungah nuntakna SUTPI in a po ding Pasian in deih hi. Eden huan laizang aa a po nuntakna singkung, sehnel gamsungaa Moses in gul gu-pha a khaina singkung, Calvary mual ah Topa Jesu nang leh kei mihingte mawhna hong maisak na ding aa a ki khaina singkung , ih pu ih pa ten inn laizang ah a na phuh uh SUTPI, tua singkungte in pumkhat a suak ahi hi.

Tuni nang leh kei nuntakna sungah tua mawh maisakna SUTPI, tua kilemna singkung, nuntakna singkung tawh khat leh khat innkuan sungah mawh ki maisak na, ki tel siamna, ki deih sakna te tawh ih nuntak ding ih han ciam ding hi.