Gam leh lei kep siam ni

IPu iPa te hun ahi mangkang te hong uk lai pan 1980 ciangdong i zogam pen singkung lianpipi tetawh nimdildial in, a etlawm mahmah bek tham lo-in vasa, innsa, gamsa te tawh nopci mahmah hi. Laphuak siam ten Et lawm zogam nimdildial ae, ana cihmah bangin singkung lopate zong tamin khuahun zong man in khuahun hoih in tennophuai mahmah hi. Ahi zongin 1990 khit ciangin singkung lian pipi I cih te pen hong bei semsem in, tun ahih leh I zogam pen khua khal lai tak bangin keugaw gam tawh ki bangin lungleng huai mahmah ta hi. Ngaihsut huai mahmah ta hi. Kumpi lam pan ahi zong in, သစ္ေတာ lampan a hi zong in, igam bang cih kepding gam hal loding, Sing phuk loding hong cih I ngak sangin, ei amun, agam aom , amun agam a teng , gammi te zovontawi Lia leh taang ten, I it ding leh I kepsiam ding thupi kasa penpen hi. Minamdang ten eimun eigam hong it sak hong kepsak het loding hi.
Tun guahtui bei in phal bi leh khua khal hun hong tung ciang ki sam lopi a, igam I hal tum mawk pen ei zomi te I iki sap na pi pen hi gige hi. Igam I hal tak teh singkung lopa teng vut leh vai suak himawk hi. Tua te guah hong zuk teh, tui in tai ahihman in kawlzang lam kawlgam nuailam aa teng te a dingin ekleiza a puakpuak hi gige in, ei gam ading teng a susiatum I hih lam ki thei lo hi hang. I gam ah singkung leh lopate hoih nawn lo ahih manin khuahun zong hong man nawn lo pah hi. Singkung om kei leh bang ci guah zuk mawk ding hiam? Singkung lopa omkei leh koilai panin tui ngah mawk ding I hi hiam? Kawl ten ဥတုဟူသည္ ေတာကို မွီ a na cih pen man mahmah hi. Khua hun in I gam ilei aom singkung lopa tetung ah aki nga na hi gige hi. Singkung lopa te hal tum mang I hih man in guah a zuk ciang guah tui ahup ding singteh lopa keu te omlo ahih manin, guahtui te pen hawktui in luang in, tui hong khang baih pah hi.
I mual te ah sing teng ki phuk khin ta ahih man in anui a singkung azung aman ding om nawnlo hi . Guah hong tam ciang men hong kicim pah in, I lo I lei te hong ki sia hi pah hi. Guah azuk ciang, ahup ding adal ding omlo ahih manin, hawk tui ten i ek leiza aom sunsun teng tai khin ta ahih man, kum khat tawntung I lo khawh nate ah apiang dingzah hong piang nawn loin, I nuntakna kum khat khit kum khat hong haksa semsem hi. Tua hih manin, kiim leh paam kepsiam ding vai puak pen ei leitung mi khempeuh te vaipuak himah hi. A diakdiak in eimun eigam, eilei ah, en i et I it kei leh mundang gamdang aom te minam dangten hongkep hongit sak hetlo ding hi. Minnam dangte I cih pen amau i, met nading ngahna ding omkei leh ei kiang ah bangmah hong semlo ding hi cih pen I tel ding thupi mahmah hi.
Tua a hi man in, tu ni-in ei zomi te, sianvon tawi ten I gam I lei kep siam ni, puah ni, zun ni, et lawm sak ni, a susia te hi kei ni. I zogam pen singkung lopa tawh a nim dildal , Innsa, gamsa te tawh a etlawm gam hi sakni. Gamsa tuamtuam te zong beng in, kaplup ding nahilo hi. Ikep dingin Pasian in hongpia hi zaw hi. Piancil LST 2 :15 na sung ah Topa Pasian in mi pa la in Eden huan kho in akem dingin akoih hi. Pasian bawlsa Eden huan a hi, i ten na leitung leh a sung aom te pen, i suksiat ciang Pasian bawl sa nate a susia i hi gige hi. I ki sapna ah zat dingin hong piak hi mah hi. Ahi zongin aval lua leh a ki sam lopi in, ei angsung ding bek ngaih sutna in, Pasian bawlsa singkung lopate, ganghing te susia nawn kei ni , puah ni, hah ni, zun ni, kem ni. I zogam et lawm sak ni, I zogam zun ni. Pasian thu um vive i hih mah bang in, Pasian leh ama bawlsa nate it ni. Kep siam ni, ci-in itna lianpi tawh kong zawn hi. Lungdam.
Lai-at , Fr. Joseph Kham

Add new comment

2 + 0 =