Velankanny Tonu pawini

Kumzalom (16) hunin India gam, Velangany khuano khat ah meigong nupi khatin apian limin akhe abai tapa khat nei hi. Tua akhe bai atapa pen nupinu in nisimin khua nawl Mawngkung nuaiah Bawngnawi zuak sak zel hi. Khualzin mite in tua Bawngnawi lei-in dawn den uh hi. Nikhat, amel ahoih mahmah numei khatin atano tawikawmin naupangnopa kiangah Bawngnawi hong lei hi. Tua hun pen sun nisat mahmah laitak hi a, mi a tawm mahmah laitak hi. Numeinu in a daangtaak mahmah atano Bawngnawi a dawn sak khit ciangin Bawngnawi zuak naupangpa kiangah Khuapi sungah va pai mengmeng inla, mi khat vasap sakin ci-in gen hi.

Naupangpa in akhe bai ahih manin lam pai zo lo hing cih a gen ciangin numeinu in atawi atano a et leh thakhat in Bawngnawi zuak naupangpa khe hong dam hi. Tua ciangin naupangpa in lungdam, kipak takin tua numeinu sawlna bangin khua sungah tai pahin numeinu sapnop mi va sapsak pah hi. Tua mi kiang a tun ciangin naupangpa in ama tunga thu piang teng gen pah a, tua mipa in zong naupangpa sapna ah zui pah hi. Bang hang hiam cih leh tua mipa ii mang sungah Tonu Maria in a gen sa ahi hi.

Mawngkung kiang atun uh ciangin Tonu Maria in Mawngkung gei ah ama adingin Biakinn khat a lam na dingin gen aa, tua khit ciangin mang pah hi. Tua thu manlang takin kizel pah a, mite in Tonu deihna bangin tua lai ah Biakinn no khat lamin Tonu lim koih uh hi. Tua Biakinn ah thungen apai khut leh khe damlo mi tampi in damna ngah uh hi.

Kumzalom (17) hun ciangin Potugal sum zong khat, Shiri Lanka ah apai laitak in lamkal ah huihpi tuakkha hi. Amah pen Catholic thuzui khat ahih mah bangin Tonu kiangah huhna ngen hi. Hih huihpi sung pan nong hotkhiat leh Tonu min suangin Biakinn khat ka lam ding hi ci-in zong kiciam hi. Tua bangin a ki ciam khit phetin huihpi leh tuihual zong dai pah hi. Ni tawm khat khit ciangin Velangany khua ah tung hi. Gun kuang tungpan tuak in lampi atun ciangin amah leilak ah khukdinin Pasian leh Tonu tungah lungdam ko hi. Ama kiciamna bangin Biakinn lam dingin angaihsut laitak, Tonu hong kilangin Mawngkung gei ah khua mite in alam uh ahi, biakinn no mun mah ah Biakinn alian khat a lamsak nading genin mangkik pah hi. Tua sum zong pa in zong Tonu deihna bangin ahoih mahmah Biakinn lianpi khat tua lai ah lamin Tonu tungah tua Biakinn ap hi.

Potugal sum zongte Velangany ah a tun ni pen September (8) ni, Tonu Maria suahni hi. Tua ahih manin tua ni pen India gam ah Velangany Tonu pawi-in ciamtehin kumsimin nasia takin Tonu pahtawina pawi bawl uh hi. Tonu in India gam mi tampi takte a dingin tua khua ah hehpihna tampi lak hi. Pumpi, kha cidamna tampi pia hi. Tua hun pankipan tu ni dong ciang, tua munah thungen apai mi bei ngeilo hi. Velangany Tonu zahtak piakna ah alamdang thu khat in kum sim tua Pawini a tun ma Novena bawl hun pen Novena dangte bangin ni (9) hi lo-in ni (11) ki bawlzel hi.