Topa Jesu biakinn ah aki-apna pawi

Topa Jesu asuah khit ni (40) acin ni-in Joseph leh Mary in Topa Jesu, Jerusalem biakinnpi ah pai-in Pasian tungah ap hi. Tua banga hih na in Pasian thukhamte zuihna leh kepna hi. “Keima tungah tacil peuhmah hong ap in; Israel mite’ lakah, naubu sunga piangkhia masa pen peuhmah mihing ahi a, ganhing ahi zongin kei’ aa ahi hi” a ci hi. (Pai 13:2). Mary in vakhu (2), ama kisiansuah nadingin ap hi.

Tua in Laisiangtho sungah “Tapa ahi a, tanu ahi zongin a kisiansuahna ni a cin khit ciangin kikhopna Puanbuk lutna a siampipa’ kiangah amah in meihal biakapna dingin kum khat a pha tuuno khat leh mawhthum biakapna dingin innvakhuno ahih kei leh vakhu khat a paipih ding hi” (Siam 12:6-8) cih thu azuih na hi. Biakinn ah Simeon kici thuman mi khat om a, amah in gumpa honpa amuhma teng silo ding cih thu Khasiangtho tungpan mangmuhna ngah hi. Simeon in Jesu amuh ciangin a angah pomin tawi a, “Topa aw, na kamciamsa bangin na silapa tu-in lungnuam takin a paina dingin thu hong pia in. Bang hang hiam cih leh ka mitte in na hotkhiatna a mu zo uh hi.

Minam khempeuhte’ mai-ah tua hotkhiatna na bawlkhol zo hi. Gentile mite’ aadinga na lah khuavak le na mi Israel mite’ minthanna ding ahi hi” (Lk 2:29-32) a ci hi. Tua kammalte azak uh ciangin Joseph leh Mary in lamdang asa mahmah uh hi. Simeon in amaute thupha pia in, Tonu kiangah “hih naungek in Israel mi tampite a kisiatna ding, a thawh kik nading lim a kiciangtansa ahi hi.

Tua ahih manin mi tampite’ lungsim tawng a kilatna dingin, nangma lungtang zong teipak in hong sunlet ding hi,”(Lk 2:34-35) ci hi. Pasian thukham bangin asep khit uh ciangin Joseph, Mary leh Jesu te Galilee gam, amau khua Nazareth ah ciah kik uh hi. Naupang hong khangto a, a thahatna hong khang in, pilna tawh kidim a, Pasian’ hehpihna thupha zong ama tungah a om hi. Simeon in “gam khempeuh ah khuavak” acih kammal hangin Nu Pawlpi in naupang Jesu Biakinn ah a ki-ap na pawi pen thupha piaksa khuaimeivakte tawh kigualin vakna te kibawl hi. Tua banga bawlna in Topa Jesu in azing ahi, hoihlohnate leh sihna te paltat in leitungah khuavak hong puakna thu lah na hi.